Mentre que los salariats d’Amazon.com en Alemanha son a la cauma per demandar un melhorament de lors salaris, lo jornal francés Libération publicava dimècres passat lo testimoniatge d’una salariada del sit de Montelaimar (Vaudaina) sus las condicions de trabalh de la megabotiga de venda en linha, qu’emplega 80 000 personas.
 
“La pression es enòrma, la fatiga de mal gerir. L’ambient es a la mesfisança. Tot es verrolhat. Abans de signar un contracte de trabalh, chal signar tres paginas que nos engatjan a la confidencialitat pus totala. Ren deu sortir de l’entrepaus; e se contatz que que siá a de concurrents, segur, mas tanben a vòstres amics e vòstra familha, aquò, o vos pòon reprochar. La paur organizaa, la susvelhança de nòstres mendres fachs e gèsts, e la contestacion reducha al silenci, es çò que se jòga chasque jorn sos los neons de l’entrepaus d’Amazon, amb la promessa d’un emplec per principala arma de persuasion”, çò ditz.
 
La salariada anonima explica lo procès de recrutament als quatre possibles pòstes de trabalh dins lo magazin d’Amazon, la mecanizacion e la desumanizacion. Mas çò de mai estonant es la constanta avaloracion e la susvelhança de las personas amb lo contraròtle numerizat, amb de camèras e amb d’agents de vigilància. S’explica de delacions, una imposicion d’objectius de mal aténher, la persuasion e l’angoissa. Tota aquela persuasion pòt arribar, encara segon aquel testimoniatge dins Libération, fins al contraròtle de la vida privada de la persona.
 
Amazon a enebida l’intrada als jornalistas, mas lo jornalista tolonenc Jean-Baptiste Malet capitèt de s’i infiltrar coma salariat e n’a publicat d’articles e lo libre En Amazonie.