Arnaud Montebourg, ministre del redreçament productiu, se desplacèt ièr a l'usina Fralib de Gèmas (País Marselhés), lòc de produccion dels tès L'Eléphant. 

 

Encontrèt a l'ostal de la comuna una delegacion de salariats de Fralib, d'elegits locals (demèst los quals i aviá Eugène Caselli, president de la comunautat urbana Marselha Provença Metropòli o Michel Vauzelle, president de la region PACA), la representanta de l'union locala CGT e lo secretari deu PC13.

 

Las negociacions, demandadas dempuèi mai d'un an pels salariats per apitar un plan per mantenir l'activitat de l'usina, se menaràn fin finala amb lo grop Unilever (proprietari de Fralib). Anoncièt tanben que l'òrdre d'expulsion dels salariats (qu'ocupan la fabrica per empedir que tiren las maquinas) seriá pas aplicat pendent tota la durada de las negociacions. Un mediator es estat designat per analizar los projèctes prepausats. S'agirà de Michel Bentounsi, lo director departamental de las entrepresas.

 

Dempuèi 1896, lo tè Elephant es estat un blason per Provença; la siá produccion es coneguda en Euròpa tota. Lo 28 de seteme de 2010, la direccion d'Unilever (que la proprietària del sit, Lipton, n'es una filiala) anoncièt la barradura de la fabrica (qu'emplegava 182 salariats), per s'anar installar en Belgica. Fàcia a aquela menaça de deslocalizacion d'una entrepresa màger del parçan, los obrièrs reagiren: cauma, campanha de boicòt contre los produches Lipton, e dempuèi començament de 2011, prepausan un plan de represa de l'enterpresa, per conservar l'Elephant a Gèmas.