Fa un momenton que se tira lo morre del costat de Carcassona, vist lo nombre de nafrats de l’esquipa primièra e las resultas de las partidas. Per arrengar las causas, per la venguda de Lesinhan, lo capitani Saddaoui e lo pilar Ismaèl Khattabi se trapèron suspenduts, aprèp quauques escambis malvenguts contra Vilanuèva, en esperar l’acamp de la Comission de disciplina de la Federacion. Aqueste dimenge, lo solelh èra de la partida del costat de Domèc. Dins las dificultats, los locals trapèron lo nhac per plan faire, nhac qu’avián ja mostrat del costat de Limós abans de plegar en fin de partida. Las vint primièras minutas vegèron un afrontament bèl e de defensas sarradas. A la 21a minuta, Vincent Anderson trapèt lo trauc dins la muralha verda e blanca, Gressèque transformèt. A la mièja ora, Benausse repliquèt per una penalitat. A la darrièra minuta, al ras del tengut, lo talonaire Nicòl embrumava la defensa de las Corbièras: 10-2 a la pausa pels Canaris.  Dins lo segond temps, los jaune e negre se tornèron multiplicar en defensa e Lesinhan se metèt a bretonejar son jòc. A la 49a minuta, Gressèque tustava a seguir e Guiraud èra lo primièr a quichar sus la pauma; quauquas minutas mai tard, a l’ora de jòc, lo dobertura carcassonés ziga-zaguejeva entre sos adversaris per puntar un ensag personal. Demorava a Ionès Khattabi de finalizar la victòria amb un cinquen ensag sus una pauma escartada sus un cinquen tengut (70a). Dins las darrièras minutas, una intercepcion de Stacul ramenava la marca finala a 26-8. Carcassona se torna plaçar per la qualificacion dins la pola dels As e marca un punt dins la tièra dels rescontres amb Lesinhan abans las doas que se jogaràn al Molin: lo 12 de genièr en oiten de finala de la Copa e lo retorn del campionat lo dimenge 19 de genièr, una partida que serà probablament decisiva per la preséncia de l’una o l’autra esquipa dins la Pola bèla de la segonda fasa.
 
Ièr tanben, se debanèt una partida de tria, jol signe de l’ofensiva, a Sant Estève entre los Dragonets e Tolosa Olimpic. Dins la setmana, los tolzans avián cambiat d’entraïnaire: exit Geli Dumàs, remplaçat per son segond Silvan Olès. La partida se joguèt sus un ritme bèl. Margalet dobrissiá la marca pels Catalans tre l’8a minuta, Joan Guasch transformava abans d’ajustar una penalitat a la 26a. Los catalans avián decidit de ne jogar doas d’aisidas a la man qu’avián pas conegut de conclusion per un ensag e que manquèron a l’ora de la nòta finala. Tolosa se tornèt plaçar a la 34a: ensag de Planàs, transformacion de Keirralah. Dins lo segond temps, Tolosa preniá l’avantatge amb dos ensags transformats: Borrèl (51a), Planàs tornar (60a) per menar 18-8. Scimone redusissiá la marca a 18-12 (70a). A la darrièra minuta, l’alièr Miloudi (replaçat a l’arrièr aprèp la nafradura de Joan Guasch) puntava dins son canton e William Bartau passava la transformacion de l’egalitat: 18-18.
 
Aquesta dimenjada, s’acabarà la mesa a jorn del calendièr de l’Elèit 1, dissabte 28, amb lo rescontre Carcassona-Avinhon (16h30) e dimenge, al Molin (15h), l’oposicion Lesinhan-Dragonets. De notar, que per plan acabar l’an 20XIII, BeIn Sport torna difusar fins al 29 de decembre tretze eveniments bèls de l’annada del XIII: partidas dels Dracs, finalas de Superliga e d’NRL, los 3 Estats d’Origina, rescontres de l’esquipa de França, fasas finalas de la Copa del Monde. Un programa encara melhor que de fetge gras trufat o de soc de Nadal en crèma pastissièra!
 
Bon Nadal a totas e a totes!
 
 
 
 
Alan Roch