La Tor deu Borrèu fa 20 ans. S'agís d'un endrech ont los joves i an trobat un luòc de luchas socialas e politicas. Mas, al delà de l'engatjament politic, çò mai important de La Tor deu Borrèu es que s'agís d'un estanquet ont se pòt parlar la lenga e ont la cultura del país a una plaça per s'exibir sens cap de complèxe, ont de joves e de vielhs pòdon trencar amb la solesa de cada jorn per tornar trobar lo gaug de partejar un veire, una musica o una experiéncia. Es per aquò que la còla de Jornalet a demandat al mond de la Tor deu Borrèu, que festèja uèi lo 20n anniversari, la cronica que publicam a la seguida.
La Tor deu Borrèu qu'ei ua associacion que vadó en 1992 entà respóner a la hami de quauques militants de tiéner un locau. Lo Comitat Euskadi, un comitat antifascista e Act Up, enter d'autes, qu'estón las organizacions organizatoras. Ad aquera epòca, la lut contra lo tunèl deu Sompòrt que s'aviè e que vadó lo movement occitan Anaram au Patac (AAP).
Au cap de quauques annadas lo locau la Tor deu Borrèu qu'estó arrecaptat per AAP arron la desaparicion deu comitat antifascista e de Act Up.
Lo nom la Tor deu Borrèu n'ei pas lo nom vertadèr d'aqueth bastiment, lo darrèr borrèu de la vila que demorè au dessús deu fronton deu barri deu Hedars on demora lo locau. L'utilizacion de l'occitan deu Bearn qu'amuisha la volontat de socializacion de la lenga istorica deu país. Aquesta reïvindicacion qu'estó, de tostemps, ua de las basas de la vita de la Tor.
Aqueste espaci que vadó un lòc de vita, de luta, de resisténcia a l'òrdi dominant e d'aprentissatge a l'autoorganizacion. La Tor qu'ei gerit per militants, simpatizants, segur benevòles, e sòcis de l'estanguet associatiu. Atau, despuish annadas, hens e davant la Tor que's son debanadas un sarròt d'activitats: repaishs populars, accions de solidaritat, bals gascons, concèrts, contes, films e debats...
Que's brembam, au miei d'autas causa, d'Ibrahim, cantaire curde, qui'ns contè lo son país, mes tanben la luta contra la pujada deu FN, contra los OGMs, tà la solidaritat enter los pòbles, campanha d'AAP contra la constitucion europèa o contra la CPE... qui estón temporadas de las bonas de la vita d'aqueth lòc.
Las grasilhadas organizadas arron las manifestacions sociaus qu'an tostemps amassat hòrt de monde e amuishar atau la necessitat populara d'un lòc atau, plan integrat locaument.
La Tor deu Borrèu qu'ei coneguda en dehòra deu Bearn e de l'Occitània. Bascos, catalans, aragonés, galicians e monde de l'Estat francés tot que son passats per la Tor deu Borrèu.
Despuish 2009, la Tor deu Borrèu que vadó lo locau deu navèth movement Libertat! qui a seguit AAP. A maugrat las provocacions policièras numerosas que ns'èm escaduts, mercès a l'implicacion deus militants tà la vita deu barri e deus simpatizants, a har víver aqueth locau despuish 20 ans.
Uei, la Tor deu Borrèu qu'ei ua part deu projècte d'Autonomia de Libertat, dont lo but de bastir los nostes utís de luta, independents deu poder. Lo 26 de mai qu'organizam a partir de 14h, hens los ancians tuaders a Vilhèra, un dia de hèsta mes tanben de luta. 15h Bal dab los Menestrèrs Gascons, seguit d'un debat sus las alternativas locaus e l'idea d'autonomia. Amics bascos que'ns presentaràn los Gaztetxe (larèrs de joens autogerits) e joens bearnés que'ns presentaràn la Larada Arrcencam dont la mia ei la medisha.
Ua mustra a l'entorn de 20 ans de la Tor que serà apitada e taulas d'informacions que seran perpausadas au mei de las quaus sus Palestina, la luta contra la Pau-Auloron...
A comptar de 20h, concèrt dab Patator (Rock Oc), Varlin (Punk EH), Igataia (Ska Cat) e Mallacan (Ska Aragonés).
JM
La tor deu borrèu, aquò que soa a temple BDSM clandestin, tròbi jo.
#3 Arrèsta ! Urosament que son aquí, que son contra los maishants ! E que son contra l'injustiça e la hami en lo monde ! Totun, que'n cau coratge per aver posicions d'aqueras !
I quau ei eth bilanç despús vint ans ? Concrètament, a avançat era causa der'autonomia der'Occitania ? Eras ideas portadas per aqueth collectiu e son, adara, acceptadas per ua partida dera populacion, e son, au mensh, un subjècte de debat ? Jo que vivi en Bearn, i ne soi pas ath corrent d'arren de tau. Qu'ei era masturbacion intellectuau d'un escabòt copat dera realitat politica, sociau i lhèu tanben culturau, shens nada influéncia sus era societat a'n viven.
Shens la Tor, Occitània seria pas parier. Mercès e felicitacions peus 20 ans!
Un luòc segurament simpatic, mès es que val los títols gròsses ?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari