Seissanta un ans après l’aver condemnat per èsser omosexual, lo Reialme Unit a demandat perdon a Alan Turing, lo paire de l’informatica, que capitèt de deschifrar lo còde Enigma de l’armada alemanda pendent la Segonda Guèrra Mondiala. Dimars passat, Turing foguèt graciat per la reina Elisabeta IIa a títol postum, en seguida de la demanda del govèrn conservator, qu’a seguit una peticion populara.
 
Lo matematician moriguèt en 1954 a 41 ans, empoisonat amb de cianur. Segon la version oficiala se suicidèt, mas sa familha e los biografes an dich totjorn que foguèt un accident.
 
E mai s’intrèt pas en preson perque acceptèt la castracion quimica, sa condemnacion l’obliguèt a quitar son trabalh al Quartièr General de las Comunicacions del Govèrn (GCHQ, centre d’escota), ont s’èra trobat après trabalhar pendent la guèrra a Bletchley Park, lo celèbre castèl que se i analisava los còdes secrets nazis.
 
Lo ministre de la justícia britanic diguèt que Turing “merita qu’òm se’n remembre e qu’òm lo reconesca per sa contribucion excepcionala als esfòrces de la guèrra e mai pel sieu legat a la sciéncia”. “Una gràcia de la Reina es un tribut adaptat per un òme exepcional”, çò apondèt lo ministre. De son costat, lo primièr ministre, David Cameron, diguèt que Turing “foguèt un òme remarcable que joguèt un ròtle clau per salvar aqueste país en la Segonda Guèrra Mondiala en deschifrant lo còde Enigma alemand”.
 
Lo perdon a Turing es arribat après una campanha de plusors ans, amb lo sosten de scientifics coma Stephen Hawking e amb una proposicion de lei presentada dins la Cambra dels Lords pel liberaldemocrata John Sharkey. En setembre de 2009, lo primièr ministre d’alavetz, lo laborista Gordon Brown, se desencusèt ja publicament per la condemnaacion de Turing.
 
Se ditz que Turing inspirèt lo primièr logotipe d’Apple, una poma mossegada, en remembrant que moriguèt empoisonat, e las colors de l’arcolan, la bandièra gai.