Un centenat de persones qu’aumplien deth tot era sala audiovisuau de Vielha ena presentacion dera seccion aranesa dera Assemblada Nacionau Catalana (ANC Val d’Aran) que s’auie constituit eth 27 de seteme passat en tot amassar as partisans dera independéncia de Catalonha. Er acte que compdèc damb era preséncia deth sindic d’Aran e de representants des municipalitats deth país. (fòtos)
 
I intervengueren Mireia Boya, presidenta dera ANC Val d’Aran; Jusèp Boya, istorian; e Carme Forcadell, presidenta dera Assemblada Nacionau Catalana. Tanben se liegec publicaments eth manifèst dera ANC Val d’Aran per part de tres sòcis dera entitat. Er acte qu’acabèc damb ua petita mòstra de dances araneses a cargue des Fradins de Vielha e fin finau Alidé Sans hec a quilhar tota era sala en tot interpretar er imne occitan.
 
Mireia Boya qu’arrebrembèc qu’era Val d’Aran ei un territòri que hè partida dera grana nacion occitana e defenec qu’era ANC aguesse ua seccion aranesa pr’amor qu’es aranesi an de hèr costat as catalans entà arténher era independéncia. Boya qu’assegurèc que solament laguens un estat catalan s’arrespectarien era lengua, era cultura e es institucions araneses, coma a ben demostrat era istòria.
 
Per çò qu’ei dera istòria, Jusèp Boya n’expliquèc sies moments clau que mèrquen era associacion volontària d’Aran damb Catalonha. Er istorian rebrembèc que Catalonha a tostemp arrespectat era singularitat aranesa e que siguec eth Reiaume d’Espanha qu’anullèc es institucions pròpries dera Val. En aqueth sens que precisèc que s’eth Decret de Nau Plan (Decreto de Nueva Planta) non abolic eth Conselh Generau d’Aran, siguec solament pr’amor qu’es Ordinacions ja n’auien retalhat es competéncies un sègle abans. Entà clauar eth sòn discors que liegèc uns vèrsi dera Copa Santa de Frederic Mistral entà explicar que catalans e occitans an caminat tostemp amassa.
 
Carme Forcadell que hec un discors long e plan argumentat sus es arrasons entara independéncia de Catalonha. Forcadell qu’alertèc sus totes es manòbres que pòt méter en marcha er estat espanhòu entà empedir-la e persutèc que calie convéncer as indecisi. Ça que la, que hec un discors generalista e bric orientat ara realitat nacionau occitana d’Aran e des sues institucions. Totun, qu’afirmèc qu’era ANC arreconeish eth dret de decidir deth pòble aranés e que correspon solament as aranesi decidir se van o non van amassa damb Catalonha. Mès que volerie plan qu’anèssem amassa.
 
 
 
 
FM/JM