Los estatjants de la comuna navarresa d’Etxarri-Aranatz, governada per Bildu, votaràn lo 13 d’abril que ven sus l’independéncia del Bascoat. La consulta, l’a organizada e convocada la plataforma ciutadana A13 per “aprigondir las valors pròprias d’una democracia, la convivéncia entre los vesins, la participacion ciutadana e la dignificacion de l’opinion dels ciutadans”. Serà la primièra municipalitat basca que dirà son vejaire sus l’independéncia per mejan d’una consulta populara.
 
Lo 4 de genièr que ven s’amassarà una assemblada d’estatjants que concretizarà la question de la consulta, segon Naiz.info. De representants de la plataforma que promòu la consulta dison que vòlon saber “quala es l’opinion dels abitants de la municipalitat d’un biais natural”, e explican que prendràn pas posicion en favor de cap de responsa, mas que vòlon garentir l’exercici del drech de decidir. Considèran que los estatjants de la comuna an “de maturitat democratica per qu’òm lor prepause un exercici ont se prendrà en compte totas las opinions, sens cap de posicion prèvia” de la part dels convocants.