L’Associacion Occitana de Fotbòl (AÒF) passa un bòn bot d’an. La còla nòstra se n’anèt la dimenjada passada en Galícia. Per aqueu rescòntre, lo seleccionaire Deidièr Amiel aguèt convocat de jogaires nòuvenguts especialament de Gasconha e Lengadòc.
 
Après sa polida victòria au torneg Tynwald Hill de l’Illa de Man, la seleccion occitana a confirmat sa progression esportiva amb una novèla victòria aisada. Pas intimidats per un public galèc vengut en nombre, lei roges e jaunes comencèron ben la partida mai lei galècs marquèron primiers. Un gòl que, bensai, metèt leis occitans mai a l’aise perque marquèron aumens 7 gòls aderren. Un festenau ofensiu que pròva que la còla occitana, compausada solament de fotbolaires amators, es ara de qualitat.
 
Per Nicolas Desachy, lo president de l’AÒF, “Occitània demòstra un còp de mai qu’existís e qu’e mai fa de bòn fotbòl; totei lei jogaires son engatjats per la causa occitana”. Per Lucas Orditz, lo gardian dei gàbias occitanas, la seleccion a fach un match seriós e mai s’aguèt pas de remplaçants. Enfin Joël Congre, que marquèt lo darrier gòl per la seleccion, se diguèt “fièr d’aver portat aquela camiseta”.
 
De segur, delà l’aspècte esportiu, aquela jornada foguèt l’ocasion per lei galècs de revendicar mai de respècte per sa lenga e sa cultura. Una manifestacion s’organizèt dins lei carrieras de Lugo, a un centenau de quilomètres a l’èst de La Coronha. E mai se leis instàncias professionalas espanhòlas èran còntra la tenguda d’aquel eveniment, la jornada foguèt un grand succès e se clavèt amb un concèrt de grops de Galícia.
 
Per 2014, l’AÒF a previst dos tornegs a l’estrange aquel estiu. Se farà tanben una partida amicala lo 3 d’octòbre a Murèth ò Rodés còntra lei sorabs, una seleccion de la minoritat eslava que rèsta en Alemanha.
 
 
 
 
Matieu Casanòva