Grècia, lo país europèu qu’a mes en evidéncia las lacunas de l’èuro, prenguèt ièr, lo 1r de genièr, la presidéncia de l’Union Europèa, de las mans de Lituània. Lo país ellèn assumís la carga pels primièrs sièis meses de l’annada amb l’intencion de demostrar que pòt plan progressar a prepaus de la lucha contra lo caumatge, de l’union bancària, de l’immigracion e d’autres afars comunautaris e mai s’es jos la tutèla dels creditors.
 
“Grècia assumís la presidéncia de l’Union Europèa amb un fòrt sens de responsabilitat cap als sieus sòcis e totes los ciutadans europèus. Los sièis meses que venon seràn un enjòc non solament per Grècia, qu’es adralhada per sortir de la crisi mercés als durs sacrificis del pòble grèc, mas tanben per l’Union Europèa ensems”, çò diguèt lo ministre dels afars exteriors, Evangelos Venizelos, dins son messatge de dobertura de la presidéncia.
 
De son costat, lo primièr ministre, lo drechista Antonis Samaras, considerèt que la presidéncia grèga ofririá la possibilitat de demostrar que lo país a ben capitat de superar sos problèmas. “Serà la presidéncia de l’espèr perque coïncidirà amb lo començament de la recuperacion economica”, çò diguèt Samaras en la presentacion del sieu programa als collègas de Brussèlas.
 
Ça que la, cal ben soslinhar que Grècia es dins una crisi economica grèva. Lo país demanda a la tròica un novèl tròç del salvament internacional, que seriá lo tresen, mas la tròica es pas gaire d’acòrdi. En mai d’aquò, la coalicion de partits qu’es al govèrn grèc es devesida per las reduccions budgetàrias; e l’ultradrecha faissista ganha de mai en mai de sostens. Lo mes de mai que ven se debanaràn las eleccions al Parlament Europèu e se prevei una pojada considerabla de totas las fòrças populistas.