Lo besonh d’ajuda umanitària per 2014 a pas de precedents, çò a avertit lo Burèu d’Ajuda Umanitària de las Nacions Unidas. Segon aquel organisme, cal 12,9 miliards d’èuros per combatre las crisis umanitàrias que se debanan sus tota la planeta. 52 milions de personas an besonh d’ajuda a causa de las darrièras crisis umanitàrias grèvas, mai que mai las guèrras en Africa e Siria e los damatges del tifon Haiyan a las Filipinas.
 
“Los faches dins la Republica Centreafricana e en Sud-Sodan an ja apondut de desenas de milièrs de personas a la lista dels qu’an de besonh de nòstra ajuda e de nòstre sosten. E amb las situacions d’emergéncia en cors en Siria, a las Filipinas e endacòm mai, nòstra capacitat de responsa collectiva e nòstras ressorsas arriban al limit”, çò alèrta lo burèu dels afars umanitaris de l’ÒNU.
 
L’an 2013 s’es acabat amb tres conflictes de gravitat umanitària de nivèl 3, lo mai naut. Lo primièr es lo damatge del tifon Haiyan, qu’en novembre passat provoquèt de milions de personas sens ostal a las Filipinas, 6000 mòrts e 2000 desapareguts. La guèrra en Centreafrica es lo segond conflicte mai grèu de la planeta segon aquel organisme de l’ÒNU, que calcula que 800 000 civils son estats desplaçats e que mai de mièg milion de personas an fam. Lo tresen conflicte seriá la guèrra de Siria. Segon l’ÒNU, aquel conflicte a provocat que i aja mai de 9 milions de personas amb besonh d’ajuda umanitària, dont 6,5 milions an quitat l’ostal e 2,3 milions an quitat lo país.