Es persones sense emplec ne cap de prestacion que perderàn era assisténcia sanitària se se’n van mès de tres mesi dehòra der estat espanhòu en un an, segontes ua mesura aprovada silenciosament peth PP enes hèstes de Nadau, e qu’entrèc en vigor eth 1r de gèr passat.

Es caumaires aranesi, e toti es ciutadans qu’agen eth passapòrt espanhòu, que pòden pérder eth dret ara atencion sanitària s’an agotat eth subsidi de caumatge e passen mès de tres mesi dehòra der estat espanhòu en un an. Atau ac a decidit eth govèrn deth Partit Popular (PP) damb dus esmendaments qu’an introdusit en projècte de lei de pressupòst entà 2014, qu’entrèc en vigor eth 1r de gèr d’enguan. Es cambiaments ara lei de sanitat e Seguretat Sociau que limiten era cobertura sanitària publica as caumaires dehòra der estat, quitament se s’agís d’un collectiu cada còp mès gran pr’amor dera crisi.
 
Eth govèrn espanhòu que profitèc es hèstes de Nadau entà publicar silenciosaments aqueri esmendaments qu’establissen tot simplament qu’es persones sense emplec, qu’agen agotat es subsidis per caumatge e que se’n vagen dehòra d’Espanha mès de nauanta dies en madeish an, e perderàn eth sòn dret ara assisténcia sanitària publica. Es qu’amassaràn aqueres condicions seràn consideradi “non residents” e perderàn eth sòn dret ara Seguretat Sociau.
 
Pendent era tramitacion dera lei des pressupòsti de 2014, eth pòrtavotz de Sanitat deth PP en Congrès des deputats espanhòu, Rubén Moreno, que confirmèc aquera exclusion, mès i treiguèc importància en tot assegurar qu’aqueth dret perdut se pòt recuperar se se certifique era residéncia en Espanha. “Se passes mès de nauanta dies dehòra deth «país», quites d’èster resident espanhòu e endevies resident d’un aute «país», qu’ei eth que te deu corbir era assisténcia sanitària en  lòc d’Espanha damb cargue as sòns impòsti”, çò justificaue.
 
Era plataforma YoSíSanidadUniversal, qu’a seguit d’apròp era tramitacion d’aqueth cambiament legislatiu e qu’a confirmat, segontes çò que publicaue VilaWeb, que çò que ja se denonciaue hè un an: que se cèrque de legislar entà eliminar eth dret ara atencion sanitària universau, “non pas entà estauviar, mès entà cambiar eth modèl. Que planhen que “cada viatge i a mès sectors excludidi der accès ara sanitat publica”.
 
 
 
 
FM