Qualques vilas de l’estat francés an enebit los espectacles de l’umorista francocameronés Dieudonné M’Bala, après que lo ministre de l’interior, Manuel Valls, publiquèsse una circulara que recomandava de los autorizar pas perque considèra qu’incitan a l’asirança antisemita. L’umorista aviá previst començar un torn que l'auriá menat dijòus passat a Nantas (Bretanha), ont ja s’èran vendudas 5000 bilhetas, divendres a Tors, e a Orleans dissabte.
 
En Occitània an enebit l’espectacle dins las vilas d’Avinhon, Bordèu, Limòtges, Marselha e Niça e lo poirián tanplan enebir a Biàrritz, Clarmont-Ferrand, Tolosa e Pau, segon la carta que publicava dimars passat France Bleu.
 
Dieudonné M’Bala es estat condemnat qualques còps per far promocion de l’antisemitisme e per d’insultes racistas. Es tanben conegut dins tot l’estat francés per un gèst qu’el meteis inventèt, nomenat “quenelle”. Aquel gèst, considerat una simulacion de la saludacion nazi per qualques uns, e d’un simple gèst iconoclasta per d’autres, es estat totjorn acompanhat d’una fòrta polemica, coma la provocacion antisemita davant l’escòla josieva Ohr Torah de Tolosa, que Jornalet raportava a final de decembre, e que la justícia mondina n’a aviat una enquèsta.
 
Un dels avocats de Dieudonné a assegurat que son client agirà “immediatament” contra las interdiccions del sieu espectacle e a remembrat que l’umorista a ganhat qualques accions en justícia dins aquel sens.