Lo govèrn federal de Brasil a decidit mandar l’armada dins lo país dels Awá-Guajá per metre fin a l’ocupacion illegala dels colons, segon çò que rapòrta Nationalia. L’armada es anada sosténer los foncionaris de l’estat que, pendent 40 jorns, notificaràn als residents non indigènas que lor cal quitar la region. Se deslotjarà las personas non autoctònas que i demoraràn, e se’n destruiràn los bastiments e installacions.
 
Survival International, una associacion en favor dels pòbles indigènas que reclamava dempuèi qualques annadas la proteccion de la nacion Awá-Guajá, a celebrat la nòva. Segon aquela organizacion s’agís de la nacion “mai menaçada de la Tèrra”. Son mens de 450 personas e lor país es entornejat e parcialament envasit per d’elevaires e de lenhaires que meton en perilh la subrevivença del pòble autoctòn.
 
Lo país dels Awá-Guajá foguèt oficialament delimitat en 1992, mas l’estat brasilièr comencèt prene de mesuras l’an passat. En junh i mandèt l’armada per empachar un autre desboscament e per destrusir qualque talhièr de ressatge. Ara òm vòl arrestar l'”intrusion” dels colons de l'industria forestièra e elevaira. De soslinhar que mai de 30% del país dels Awá-Guajá es estat desboscat pels colons e las entrepresas forestièras, segon de donadas de l’agéncia publica brasilièra FUNAI.