Actualitats
An detengut uèch personas de l’entorn dels presionèrs d’ÈTA en Bascoat
Ditz EPKK-Collectiu de Presonièr Politics Bascos, que s’agís d’una accion contra eles
Ièr dimècres, a tres jorns per la manifestacion en favor dels dreches dels presonièrs d'ÈTA, d’agents de la Garda Civila espanhòla intrèron dins lo burèu ont trabalha l’avocada Arantza Zulueta, a Bilbao, e detenguèron los avocats Arantza Zulueta e Jon Enparanza Aguirre, e tanben a las quatre personas que se trobavan reünidas amb eles. Son Aitziber Sagarminaga Abad (èx-presonièra d'ÈTA, liberada en 2009; ela es la persona que reservèt lo Kafe Antzokia de Durango), José Luis Campos Barandiarán (tanben èx-presonièr d'ÈTA, empresonat pendent 7 ans en França, liberat en 2011), Egoitz López de la Calle Uribarri (acusat un jorn d'èsser lo responsable de tresaurariá de Jarrai e Haika en Alaba, foguèt condamnat per l'Audiéncia Nacionala a 3 ans e mièg de preson, puèi foguèt absolgut pel Tribunal Suprem. Mas passèt en preson pendent entre 2001 e 2005), José Miguel Almandoz Erviti, (èx-presonièr d'ÈTA, empresonat pendent 9 ans en França, e liberat en 2012).
Tanben, Asier Aranguren Urroz foguèt detengut a Burlata, al près de Pampalona. Aranguren, èx-presonièr d'ÈTA, liberat en 2010, foguèt empresonat pendent 7 ans en França, per formar partida del sieu aparelh d'informacion.
E Miren Aintzane Orcolaga Etxaniz, foguèt detenguda a Hernani. Orcolaga es èx-presonièra d'ÈTA, foguèt empresonada pendent 5 ans en França. Foguèt liberada en 2009.
Totes fasián partida d’un grop creat en julhet de 2012 per un vintenat de personas amb la tòca de facilitar l’interlocucion del Collectiu de Presonièrs Politics Bascos (EPPK segon sa sigla en basc) amb l’exterior.
Joan Enparantza es un avocat restacat al movement proamnistia, pro conegut per aver representat la familha de Jon Anza, lo militant d’ÈTA que son còrs foguèt trobat dins una mòrga de Tolosa de Lengadòc.
Segon lo Ministèri de l’interior espanhòl, los detenguts fan partida del grop KT, lo “tentacul que contraròtla los presonièrs e los somet a lor tirania”. De fonts del ministèri an tanben dich que s’agís d’una operacion començada fa qualques meses e dirigida per l’Audiéncia Nacionala, un tribunal espanhòl d’excepcion. De son costat, lo collectiu EPKK a dich sus Twitter, que s’agís d’una accion contra eles.
#EPPK ren Bitartekaritzaren aurkako operazioa da. Tsunamia behar dugu! #TantazTanta
— EPPK bt (@bt_eppk) January 8, 2014L’operacion seguís dobèrta e se pòt produsir mai de detencions.
Aquelas detencions arriban en seguida d’un acte dels èx-presonièrs d’ÈTA que se debanèt la dimenjada passada a Durango. Dins aquel acte, fòrça criticat pel govèrn espanhòl, reconeguèron la dolor causada e tanben denoncièron las mesuras d’excepcion qu’an patidas e qu’a quitament condemnat la Cort Europèa dels Dreches Umans. Demandèron una politica penitenciària justa, la liberacion dels presonièrs politics e se mostrèron partisans del drech de decidir del pòble basc.
D’acamps de protèsta se son debanats a Bilbao e dins d’autras vilas.
_____
－ Berria: Zortzi dira jada Guardia Zibilak atxilotutako EPPK-ren bitartekariak
－ Naiz: La Guardia Civil detiene a ocho personas en un operativo contra la interlocución de EPPK
－ Deia: Ocho detenidos en una confusa operación de la Guardia Civil contra el grupo de enlace de los presos de ETA en Euskadi
－ El Diario Vasco: Al menos ocho detenidos en una operación contra abogados de presos de ETA
－ El Correo: Ocho detenidos en una operación contra los abogados de etarras en el País Vasco y Navarra
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Mercés per aqueste article!
Los Castelhans deurián remarcar que, contràriament a çò que n'èra en 1936, l'Alamanha actuala es pas nacional socialista. Del mai la contestacion abertzale s'umanisa, se legalisa, se sarra del caminament democratica de l'independentisme catalan, e del mai los estats colonialistas francés e espanholista fan venir lor politicia extrèma-dreitista, coma s'una potència autoritarista del tipe nazi los anava venir ajudar d'aquí deman per oprimir los pòbles que demandan sonque de far valer son dreit elementari a l'autodeterminacion. Son venguts, aqueles dos estats, completament fadòrles ? Arrestar d'avocats qu'ensajan de far valer lo dreit e la lei a egalitat per totes ?!! Perqué pas los encelar jos la ciutat medievala de Carcassona per aver albergat un o dos còps un parelh de catars fugidisses fa ja vint o trenta ans, tant que i son…?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari