En 2014 los occitans remembram los 150 ans de la mòrt de Jansemin, lo centenari de la mòrt de Frederic Mistral e de l’assassinat de Joan Jaurès, e tanben lo començament d’una guèrra que causèt lo chaple mai grand qu’a patit lo nòstre pòble. Al delà d’aquò, los catalans commemòran lo 300n anniversari de la pèrda de sas libertats e los bretons lo 500n anniversari de la mòrt de sa darrièra duquessa sobeirana, Anna de Bretanha, que moriguèt lo 9 de genièr de 1514.
 
Coma rapòrta lo jornal catalan VilaWeb, lo govèrn d’Anna de Bretanha signifiquèt un moment d’inflexion en l’istòria del país cèlta, que malgrat sa fòrta resisténcia, perdèt son independéncia per la fòrça de las armas e dempuèi alavetz fa partida de França.
 
Anna, filha e eiretièra del darrièr duc de Bretanha, Francés II, après fòrça maquinacions, se maridèt amb Carles VIII, rei de França. Aquel maridatge representèt l’associacion de Bretanha a la monarquia francesa. E a la mòrt del rei se manobrèt per la maridar amb lo nòu rei francés, Loís XII, cosin del precedent, e assegurar aital l’union futura de Bretanha amb França.
 
Anna de Bretanha, coma referent de la sobeiranetat del país e la volontat de resisténcia, es un simbòl de l’identitat bretona e per aquò lo 500n anniversari de la siá mòrt es commemorat amb de desenats d’actes pels cinc departaments que dividisson Bretanha administrativament: i a de messas de remembre, d’acamps davant lo sieu monument, de conferéncias e de debats; e tanben amb l’inauguracion d’un nòu licèu amb lo sieu nom a Sant-Ervlan e la realizacion d’una fresca giganta.
 
Lo jornal breton 7Seizh publica la lista d’aquels eveniments, dont la majoritat son organizats o coordinats pel Comitat Anna de Bretanha, constituït arunan.