Los partits basquistas seguents, Partit Nacionalista Basco, Sortu, Eusko Alkartasuna, Aralar e Alternatiba, Geroa Bai, amb los sindicats ELA e LAB, manifestaràn en silenci uèi a 18h a Bilbao jol lèma “Dreches umans, acòrdi, patz”. Aquela protèsta se convoquèt ièr après que l’Audiéncia Nacionala espanhòla, un tribunal d’exepcion, enebiguèt la manifestacion de sosten als presonièrs bascos convocada per la plataforma Tantaz Tanta (gota a gota).
 
La manifestacion unitària d’uèi es la responsa a aquela enebicion e fa que pel primièr còp l’esquèrra independentista basca e lo Partit Nacionalista Basco manifèsten amassa per cambiar la politica penitenciària dels presonièrs bascos dins l’encastre del procès de patz.
 
Lo collectiu Tantaz Tanta a decidit de desconvocar la manifestacion enebida per çò que dins la manifestacion d’uèi i aurà pas son logotipe. Ça que la, lo collectiu a manifestat que sa campanha a ben capitat. Lo jutge Eloy Velasco decidiguèt d’enebir aquela manifestacion perque considèra que Tantaz Tanta son los eiretièrs de l’organizacion Herrira, que sosteniá los presonièrs d’ÈTA, e qu’el l’illegalizèt en setembre passat.
 
Lo pòrtavotz del govèrn basco, Josu Erkoreka,  diguèt que l’enebiment de la manifestacion de Tantaz Tanta èra “fòrça grèu e incomprensible per la societat basca”. “Cada an se son debanadas de manifestacions identicas, quitament a l’epòca qu’ÈTA èra activa, sens cap de sòrta d’obstacle, dificultat o enebicion administrativa o judiciària”, çò remembrèt, en tot soslinhar qu’aquela proïbicion fariá pas calar “una revendicacion majoritària de la societat basca” qu’a l’ora d’ara exigís “una nòva politica d’estat per la patz, que comprenga una politica penitenciària nòva e desparièra”.
 
En setembre passat, la Gàrdia Civila detenguèt un vintenat de membres del collectiu Herrira per òrde del quite jutge Eloy Velasco, que lor barrèt lo sit web e los comptes sus Twitter e Facebook. Aquela ofensiva policièra e judiciària portèt de desenats de milièrs de manifestants per carrièras a Bilbao cinc jorns puèi.
 
Fa doas setmanas, lo Collectiu dels Presonièrs Politics Bascos (EPPK segon sa sigla en basco) faguèt un comunicat qu’acceptava la politica penitenciària e anonciava sa disposicion a cercar de sortidas individualas a la situacion dels presonièrs. De mai, reconeissiá lo patiment general e fasiá un renonciament exprès “al metòde utilizat dins lo passat”. Qualques jorns puèi, dimècres passat, la Gàrdia Civila intrèt dins un burèu d’avocats d’aquel collectiu e ne detenguèt uèch personas.