Tres quartièrs d’Amborg (Alemanha) son estats declarats coma “zònas perilhosas” amb una vigilància policièra especiala, çò que compòrta de contraròtles exaustius e que cèrtas personas n’ajan l’intrada enebida. Aquò se fa en seguida dels atacs de las darrièras setmanas contra de bastissas policièras pr’amor del barrament d’un esqüat actiu dempuèi 1989.

Los quartièrs d’Altona, Sankt Pauli e Sternschanze d’Amborg (Alemanha) son estats declarats “luòcs perilhoses” e se tròban jos vigilància policièra especiala, çò que compòrta de contraròtles exaustius e que cèrtas personas n’ajan l’intrada enebida. De fonts de la polícia alemanda raportèron la dimenjada passada 263 contraròtles e 62 personas expulsadas d’aqueles quartièrs.
 
La rason d’aquela mesura d’excepcion es que “dins las darrièras setmanas, d’agents e de bastissas policièras an fach l’objècte de nombrosas agressions” segon la polícia.
 
Los movements socials e los partits politics d’esquèrra an criticat aquela declaracion de “zònas perilhosas”. Las criticas son tanplan arribadas als rets socials, mai que mai sus Twitter amb las etiquetas #Gefahrengebiet e #Hamburg.
 
Los afrontaments en aquela vila son constants dempuèi lo 21 de decembre passat, après que la polícia carguèsse contra de milièrs de manifestants, en provocant de centenats de ferits, que protestavan contra lo barrament del Rote Flora, un esqüat istoric qu’èra en un ancian cinèma dempuèi 1989.