“L’Oustal” foguèt inaugurat al començament de febrièr e compta ja amb mièg centenat de sòcis. Lo local a un bar, una sala de conferéncias e d’amassadas, e un espaci ont se pòt practicar las arts marcialas. Malgrat que formalament i a pas de ligams entre “L’Oustal” e lo movement nacionalista francés “Blòc Identitari”,las doas entitats an un acòrdi de collaboracion. Dins aquel sens, qualques unes dels sòcis del local son a l'encòp membres d’aquel partit identitari francés. 


 




Lo refús d’una partida de la societat tolosana davant la dobertura de “L’Oustal” es basat sul fach qu'aquela associacion assegura defendre l'identitat, la cultura e la lenga occitanas, mas o fa d’un vejaire opausat a l’occitanisme istoric e egemonic. Coma fòrça autras culturas europèas, la cultura occitana respond pas a de critèris etnics ni racials, mas se bastís sus una identitat collectiva inclusiva. Per contra, qualques posicionaments de “L’Oustal” e d’autres grops identitaris franceses comprenon la defensa de las lengas e culturas regionalas sus unes critèris controvertits, pròches dels posicionaments extremistas. 


 




Ça que la, los responsables del local identitari negan aquelas acusacions e se remeton als sieus estatuts constitutius, qu'asseguran que “L’Oustal” a coma fin de “descobrir e transmetre l'identitat culturala tolosana e occitana” e “la promocion e la participacion a d'activitats culturalas e esportivas”. Aquelas afirmacions an pas calmat las protèstas e prevencions de fòrça associacions occitanas. Dins aquela linha, paucas setmanas après que “L’Oustal” dobriguèsse las siás pòrtas, Convergéncia Occitana daissèt clar lo sieu vejaire. Lo president de l’entitat occitanista, Joan-Francés Laffont, remembrèt las valors de tolerància e egalitat que caracterizan l’occitanisme e afirmèt que, per contra, “L’Oustal” defend Occitània a partir d’un “vejaire fòrça particular”. 


 




Las protèstas contra lo nòu local se son pas acabadas amb la manifestacion del 17 de març e qualques organizacions meton jos monitoratge las activitats del local polemic. Dins aquel sens, la possibla preséncia de militants identitaris franceses e sòcis de “L’Oustal” a la manifestacion 'Anem, Òc!' del 31 de març a Tolosa a causat d’inquietud. Divèrsas organizacions occitanistas, coma l’IEO o Convergéncia Occitana, an mes en evidéncia que “caldrà pas tolerar en aquela manifestacion la preséncia de personas o de grops que revendiquen e mòstren una vision xenofòba d’Occitània”.