Los mèdias franceses son plens de detalhs sus la presumida relacion amorosa entre lo president François Hollande e l’actritz Julie Gayet, çò qu’es fòrça estonant en una societat que respècta la vida privada de sos òmes politics. Mas aquel afar a fach subitament una virada. Segon d’informacions publicadas sus Mediapart e Le Point, l’apartament ont se trobarián Hollande e Gayet es proprietat de Michel Ferraci, un òme condemnat a 18 meses de preson per una question d’emblanquiment d’argent. Al delà, lo jutjament demostrèt las relacions de Ferraci amb un dels caps del Gang de la Brise de Mer, Richard Casanova, assassinat en 2008.
 
L’apartament, plaçat al numèro 20 de la Rue du Cirque a París, fòrça près del palais de l’Elisi, pòrta lo nom de Ferraci sus la boita de las letras e sus l’annuari telefonic. A l’ora d’ara i demòra Emmanuelle Hauck, la femna de Ferraci que se separèt d’el, e qu’es amiga de Julie Gayet.