La partida d’oiten de finala de Copa entre Lesinhan e Carcassona al Molin tenguèt aqueste dimenge totas sas promessas dins l’intensitat dramatica d’una partida eliminatòria: lo dobte sus la resulta finala, lo ten-tu ten-ieu a la marca, de cartons e caramèls, d’iniciativas audaciosas o azardosas, quauquas decisions arbitralas arbitràrias, de nhac e de volontat de las doas parts. Per un còp, las penalitats foguèron temptadas: atal, Benausse ne marquèt 4 pels Verds e Gressèque doas pels vesitaires. Dins lo primièr temps, un ensag de Bodebza al ras del tengut respondiá a la dobertura de la marca per Mazard dels Canaris. A la pausa, los Singlars viravan primièrs: 10-8. Tre la represa, Benausse ajustava un ensag pels locals. Carcassona tornèt l’auçada a l’ora de jòc amb un ensag del jove segonda linha Bastian Canet, servit sus un platèu pel Maxim Gressèque, e preniá un avantatge definitiu dins las dètz darrièras minutas amb Sobeiràs (70a) e Mazard tornar (74a) a la conclusion d’atacas de tria, amb Vincenç Anderson coma rampa de lançament. Benausse daissava tombar un darrièr balon al moment d’aplatussar e Carcassona s’emportava la qualificacion 26-20.
 
Dins l’autre afrontament entre esquipas d’Elèit 1, los Dragonets s’impausèron sens dificultat a Vilanuèva: 36-10.
 
Dins las partidas entre Elèit 1 e Elèit 2, Baó opausèt una brava resisténcia al Tolosa Olimpic per plegar fin finala 36-22 e Palau se deguèt tanben emplegar a Realmont: 20-12.
 
Avinhon ganhèt aisidament 50 a 10 cò dels Tolosa Broncos.
 
Limós coneguèt cap de problèma cò dels Batalhièrs de Pià: 50-12 amb tres ensags per l’arrièr Taylor.
 
Dins l’afrontament entre esquipas d’Elèit 2, Lion gardèt l’avantatge sus Albi: 14-8.
 
Mas la proesa del jorn reven a la formacion de Nacionala 1 de Vilagalhenc-Argon (resèrva de l’AS Carcassona) que dissabte sus sa pelena, al tèrme d’un partida dinamica e mestrejada, capitèt de gardar un punt d’avança, 27-26, sus la formacion d’Elèit 2 de Carpentràs.
 
Los quarts de finala son previstes per la dimenjada dels 22 e 23 de febrièr. Aquela dimenjada se debanarà l’abansdarrièra jornada de la primièra fasa del campionat d’Elèit 1. En cap d’aficha, un novèl rescontre al Molin entre FC Lesinhan e AS Carcassona, rescontre decisiu per l’obtencion de la quatrena plaça qualificativa per la pola bèla de la segonda fasa.
 
Vilanuèva e Dragonets se tornaràn trapar a l’estadi Max-Rousiè. Al programa tanben: Palau-Avinhon e un prometeire Limós-Tolosa.
 
D’aquel temps, Laurenç Fraissinós a balhat la tièra dels 25 jogaires que defendràn prioritàriament las colors catalanas en Superliga jol malhòt dels Dracs.
 
Cinc novèls rapòrt a la tièra de l’an pasast: Morgan Escarré qu’a ganhat sa plaça, Eliott Whitehead arribat aqueste ivèrn e los tres novèls venguts: lo centre Ben Pomeroy, l’alièr Michael Oldfield e lo pilar Jeff Lima. Abans la represa de la competicion, los Dracs reçaupràn a Brutus los London Broncos (dissabte 25 de genièr) e Widnes (lo 1r de febrièr).
 
 
 
 
Alan Roch