Lo president francés, François Hollande, faguèt ièr la tresena conferéncia de premsa de son mandat, en un moment que sa popularitat es bassa e a pauques meses de las eleccions municipalas. Hollande compareguèt tot sol davant 500 jornalistas.
 
Los supausats afars amoroses del president francés amb l’actritz Julie Gayet avián levat una expectacion maximala, pr’amor del triangle amorós completat per la companha sentimentala del president, Valérie Trierweiler, que foguèt espitalizada après la publicacion de l’afar. Lo fach qu’Hollande aja una calinhaira pausa la question sul ròtle de Trierweiler coma primièra dòna de França, tant qu’ela e lo president se son pas maridats. Lo fach que l’apartament ont Hollande e Gayet se veirián poiriá èsser de la màfia còrsa, segon qualques mèdias, es una autra revirada pel president.
 
Hollande comencèt son intervencion en parlant de l’economia. Remarquèt l’importància de trabalhar per sortir de la crisi e que per o far “cal produire mai e melhor”. Dins aquel sens, lo govèrn francés metrà en marcha un plan de responsabilitat per las entrepresas; se simplicarà la burocracia, se reduirà lo còst del trabalh e se modernizarà la fiscalitat. Tot aquò per crear d’emplec e tornar aviar l’economia de l’estat francés.
 
L’afar amorós apareguèt al torn de certanas questions. “Dins qualques setmanas, seretz recebut pel president dels Estats Units. La question es: Valérie Trierweiler es encara la primièra dòna?”, çò demandèt un jornalista. “Compreni la vòstra question e soi segur que comprendretz ma responsa. Cadun dins sa vida personala pòt traversar d’espròvas. Es lo nòstre cas, son de moments doloroses, mas ai un principi e es que los afars privats se tractan en privat, dins una intimitat respectuosa de cadun. Aicí es pas lo luòc ni lo moment per o far”, çò respondèt Hollande que, pasmens, s’engatgèt a esclarzir lo ròtle de Trierweiler abans de rescontrar Barack Obama.
 
 
Lo nombre de regions poiriá cambiar
 
Hollande anoncièt tanben que, per far d’estalvis, se reüniriá amb el cada mes un Conselh Estrategic de la Despensa Publica. Lai fixaràn las prioritats e avaloraràn las politicas publicas. Mas lo president compta tanben amb una nòva estapa de descentralizacion per reduire las despensas de las collectivitats. Demest las pistas evocadas, parlèt de novèls transferiments de competéncias a las regions, dont lo nombre poiriá “evolucionar” dins un chepic d’eficacitat.