Bèra suspresa en aqueste debut d’annada, entaus qui aiman lo metal en occitan: la scèna, pichona enqüèra, que ved arribar un grop navèth! Boisson Divine que vien de sortir lo son purmèr album distribuit peu labèl francés Brennus Music (un labèl pro conegut dens lo mitan deu heavy melodic e qui venè ja discs de musica occitana) e de har los sons purmèrs concèrts. 

Nau cançons de heavy metal dirècte, classic mes sincèr, produsit d’un biaish hòrt professionau, dab un cant brut, inspirat meilèu per la canta pirenenca e las cançons d’après-match-de-rugbi que per las cridadissas suberagudas d’un Judas Priest o d’un Manowar. Qu’i sentim tanben l’influéncia deus vesins bigordans d’Stille Volk / Hantaoma (eths que son de Gers).
 
“Ua musica universau e intergeneracionau qui amassa a l’entorn d’ua sola taula un metallista cap e tot e un pepé gascon deu berret usat peu temps!” com ac disen los quites musicians suu lor sit boissondivine.com
 
Que s’i enten tanben boha, flabuta e autes instruments tradicionaus de temps en quand... Que s’i enten francés tanben dens tres cançons, e los musicians qu’explican qu’a l’epòca on comencèn d’escríver e de compausar en 2005, n’èran pas enqüèra pro adaise en occitan, qu’aquestas cantas en francés e’us agradan tostemps mes que l’aviéner deu grop se harà tot en gascon.  
 
De dus musicians per har lo disc, que son passats recentament a quate entà har concèrts...
 
Lhèu e’us ausiratz lèu!
 
 
 
 
Pascau Sebat