Lo primièr ministre francés, Jean-Marc Ayrault, lo ministre de l’interior, Manuel Valls, e lo de l’ecologia, Philippe Martin, anèron ièr en Tolonenc e en las Mauras per constatar los damatges dels aigats. Ailà Ayrault prometèt que lèu se prendriá un decret de catastròfa naturala. “I a un esfòrç immens de far per remetre tot aquò en marcha”, çò diguèt lo primièr ministre a La Lònda dei Mauras, en tot veire los vaissèls esparpalhats del pòrt de la vila provençala, ont 600 abitacions son estadas tocadas per la crescuda de las aigas; en mai d’aquò un òme moriguèt negat dins sa cava. Totas las autras personas portadas desaparegudas son estadas retrobadas.
 
Lo decret d’estat de catastròfa naturala “es una question de jorns, es indispensable”, çò jutgèt Ayrault, segon çò que raportava ièr Le Figaro. Après l’inventari e tota la papierassa, lo primièr ministre estima que i aurà una “indemnizacion rapida” dels particulars e de las entrepresas e una “remesa en marcha de las activitats economicas”.
 
Ayrault ensagèt tanben de traire de leiçons d’aquela catastròfa. “Cal quitar de construir aquí ont i a de risques”, çò diguèt. Lo cònsol de La Lònda dei Mauras, François de Canson, apondèt que se bat “dempuei sieis ans per que lei zònas de riscs sigan repertoriadas. I a d’abitacions dins lei zònas inondablas, mai es de nòstre dever d’assegurar lei bens e lei personas. Avèm fòrça trabalh de far”, çò diguèt.
 
Ièr diluns comencèt la descrescuda, après tres jorns de pluèjas violentas.
 
L’estat de catastròfa naturala es un dispositiu legal de l’estat francés, instaurat per la lei del 13 de julhet de 1982. Quand una municipalitat es sinistrada, lo cònsol pòt demandar al Ministèri de l’Interior una reconeissença d’estat de catastròfa naturala. S’es acceptada, los abitants de las comunas son indemnizats.