Los afrontaments entre manifestants e policièrs pendent los darrièrs jorns a Kyiiv, en Ucraïna, ja an provocat de mòrts.Cinc manifestants foguèron abatuts pel fuòc de la polícia. Segon lo ministèri public ucraïnés, òm trobèt doas d’aquelas victimas dins una bibliotèca nacionala près del luòc dels afrontaments. Una autra persona moriguèt en tot tombar d’una de las colomnas d’intrada de l’Estadi Lobanovskiy, lo terren de fotbòl ont jòga lo Dynamo de Kyiiv.
 
Lo ministèri public a confirmat aquelas mòrts, mas la polícia nega aver emplegat d’armas de fuòc. Lo primièr ministre Mykola Azarov a assegurat que las manifestacions antigovernamentalas “an portat de terroristas per carrièras” e que “se punirà totas las accions criminalas”. Dins un discors davant los membres del sieu govèrn, Azarov acusèt los manifestants de la Plaça de l’Independéncia, qu’el apèla “terroristas”, d’aver capturat e batut qualques desenats de personas.
 
Dempuèi dimenge, la polícia assauta los acampats de la Plaça de l’Independéncia, que manifèstan dempuèi dos meses contra lo govèrn de Ianukovych, car aquel govèrn se sarra de Russia e los aluènha de l’Union Europèa.
 
Las sancions contra los manifestants son de mai en mai duras e, dins los incidents, i a agut mai de 200 ferits.
 
L’Union Europèa a avertit Ucraïna de possiblas sancions per aquel usatge de la violéncia contra los manifestants. Lo president de la Comission Europèa, José Manuel Durão Barroso, afirma qu’estudiaràn d’a fons los darrièrs eveniments. Segon Brussèlas, la restriccion de libertats de la part del govèrn ucraïnés es quicòm d’inadmissible.