Lo filme Amour del realizaire austrian Michael Haneke a ganhat la Palma d'Aur de la 65a edicion del Festenal de Cinèma de Canas (Vencenc). Es lo segond còp qu'Haneke ganha la Palma d'Aur, que la ganhèt tanplan en 2009 per Das weiße Band.

Lo realizaire austrian Michael Haneke as pas volgut far cap d'interpretacion a prepaus del filme ganhant perque, coma a dich, es un trabalh dels espectators.
 
Ça que la, Haneke a soslinhat que "cal totjorn parlar de l'amor". Lo filme parla d'un matrimòni tocat per una malautiá terminala, una situacion familhala que lo cineasta visquèt personalament. Los protagonistas son Jean-Louis Trintignant e Emmanuelle Riva.
 
Quant als autres prèmis, Reality, de l'italian Matteo Garrone, a ganhat lo Grand Prèmi del festenal.
 
De son costat, lo mexican Carlos Reygadas a ganhat lo prèmi del melhor director pel filme Post Tenebras Lux, una parabòla sus la violéncia en Mexic.
 
Lo prèmi del melhor actor masculin es estat per Mads Mikkelsen, pel filme Jagten del director danés Thomas Vinterberg. La palma d'aur a l'interpretacion femenina es anada a las inseparablas actrises romanesas Cristina Flutur e Cosmina Stratan.
 
Lo director Ken Loach, un abitual del festenal, a ganhat lo prèmi de la jurada pel filme The Angel's Share.