Lo president dels Estats Units, Barack Obama, signèt lo 22 de genièr de 2009 un òrdre executiu qu’obligava de barrar lo camp de concentracion de Guantánamo. Aquel òrdre se deviá far efectiu just après un an. Dimècres passat, faguèt cinc ans d’aquela decision, mas Guantánamo demòra dobèrt, malgrat la polemica suls marrits tractaments que i recebon los detenguts. La chifra dels presonièrs es pas publica, mas s’estima que son aperaquí 150 òmes, que los primièrs i arribèron fa dotze ans.
 
La majoritat dels presonièrs lai son pas estats acusats formalament, e òm a jutjat solament 1% dels mai de uèch cents òmes que son estats detenguts ailà. Lo govèrn estatsunidenc profiècha del fach que lo sit es dins lo territòri cuban e aital pòt evitar que s’i aplique las leis dels Estats Units. De fach, la sola jurisdiccion reala es la del cap militar del sit.
 
La majoritat dels detenguts de Guantánamo i son jos l’acusacion d’aperténer a Al Qaida. Òm los detenguèt dins divèrses païses e òm los menèt a Cuba sens la permission dels govèrns implicats, e quitament sens qu’aqueles govèrns o saupèsson.
 
Lo refús d’aquel camp per la comunautat internacionala, e las voses criticas dins los Estats Units, an pas obtengut qu’Obama se senta obligat de complir l’òrdre qu’el meteis signèt fa cinc ans.