Pendent las susmautas deu printemps arabe en 2010 e en las eleccions qui an seguit en Africa deu nòrd, Turquia e AKP èran sovent citats com un exemple de desvelopament per cada Estat musulman. Vertat ei, Turquia beneficia d'ua grana creishença economica qui a permetut a Tayyip Erdoğan de ganhar shens contèsta las très darrèras eleccions. Una eresia en aquèth país longtemps mestrejat per l'armada, gardiana de la laicitat. L'armada qui n'esitè pas a interviéner regularament en la politica turca per impausar sas ideas – se pòt parlar notadament deu sanguinari còp d'Estat de 1980-.

 

Despuish son arribada au poder, l'AKP s'opausa a d'aquera man-mesa de l'armada e sembla aver ganhat lo combat. Après aver esvitat una dissolucion deu partit per inconstitucionalitat, en mensh de 3 ans, l'AKP a arrestat una grana partida deus gavidaires de l'armada, acusats de complotar contra lo regime. Dab l'ancian numèro 1 İlker Başbuğ, detzenats de responsables de l'armada son renduts responsables de maniganças contra lo poder e contra l'islam.

 

Lo responsable supausat deus numerós procès perpetuats contra l'armada s'apèra Fethullah Gülen, un imam turc demorant aus Estats Units e qui a bastit una confrairia musulmana multimiliardària, shens nat dobte la mei importanta au monde. Presents un pauc pertot sus lo planèta, los disciples de Fethullah Gülen son sustot aplicats a s'introdusir en totas las estratas de la societat turca. Per exemple la polícia s'ei granament islamizada aquestas darrèras annadas e a quasi près la plaça de l'armada. En mars de 2011, aquera polícia arrestè Ahmet Şık, un jornalista escrivant sus la confrairia de Gülen. Dab eth un centenat de jornalistas son empresonats uèi per lo poder turc, acusats de manigançar contra l'AKP o d'aver activitats ditas terroristas.

 

Se d'un costat, l'AKP supòrta pas mei las criticas, de l'auta part la paraula islamista s'ei liberada en Turquia e los perpaus favorables a la Sharia o a la poligamia son pas mei condemnats. L'islamizacion lenta mes segura de Turquia a de consequéncias concrètas dens la societat e qui van sovent au contra deus drets de las hemnas. Purmèr son mei anar mei numerosas las hemnas qui pòrtan lo vela, un vela que l'AKP a autorizat a l'universitat. L'escòla en Turquia jòga pas mei son ròtle de temple protector. Per esvitar a las hemnas un marridatge forçat, una lei empachava las estudiantas de se marridar, lei que l'AKP a suprimit. Tanben aqueste mes de mai, lo purmèr ministre Erdoğan a directament contestat lo dret a l'avortament, considerant qu'èra "un assassinat contra lo fetus". Los movements feministas turcs an viste reagit en manifestar a Istanbul dimenge passat, blocant lo trafic per davant un bastiment deu purmèr ministre. 

 

Conscient que se pòt pas impausar uèi l'islam com religion d'Estat en aquèth país enqüèra hòrt estacat a la simbolica d'Atatürk, l'AKP, profieitant d'una esquèrra laica turca dividida e d'una dreta nacionalista aflaquida, tribalha lentament las consciéncias. Mes au cap deu camin, la resulta ei parrièra que per los país ubertament islamistas: una condicion feminina mespresada, una concepcion retrograda de la familha e una societat dependenta d'una doctrina relogiosa qui garanteish au poder ua somission mei grana deus ciutadans.

Matieu Casanòva