Lo partit bretonista reclama una “Euròpa federala” basada sus de “regions fòrtas e solidàrias”. La formacion pensa que las euroregions pòdon èsser la clau per la reorganizacion regionala de França.

Lo principal partit breton en nombre de vòtes, l’Union Democratica Bretona (UDB), concorrerà a las eleccions europèas del mes de mai que ven per fin de defendre una Euròpa dels pòbles e, tanben, cercarà d’aprofechar l’encastre de l’Union Europèa per argumentar la reünificacion de Bretanha (lo departament del Léger Atlantic, istoricament breton, fa partida de la region dels Païses de Léger).
 
En anonciar que se presentariá a las eleccions europèas, l’UDB se declarava totalament favorabla a una “Euròpa federala que se tenga sus las regions fòrtas e solidàrias, una Euròpa mai democratica, que done als elegits europèus la capacitat de decidir e d’agir per melhorar Euròpa”. Los domenis que lo partit breton considèra que i deurián agir los representants europèus son, entre d’autres, la justícia fiscala, la libertat e proteccion dels ciutadans, la regulacion del sistèma financièr, las politicas d’emplec e la reconeissença de la diversitat culturala e lingüistica.
 
L’UDB ditz qu’a Euròpa li cal “un nòu alen”, per “combatre lo liberalisme predator e per far progressar las solidaritats e la justícia sociala”. Cal dire pro a l’Euròpa “considerada coma un grand mercat ont la desregulacion es una prioritat”.
 
Lo partit breton defend la constitucion d’una “lista d’esquèrra que jonga lo progrès, la solidaritat, l’ecologia e la regionalizacion”. Fa cinc ans, los bretonistas participèron a aquel vòte dins la coalicion Euròpa Ecologia, qu’agropava Los Verds e la Federacion Regions e Pòbles Solidaris.
 
 
La reorganizacion de las regions francesas
 
La dimension europèa es importanta per una UDB qu’es intrada d’en plen dins lo debat sus la reorganizacion de la mapa regionala francesa, que lo president François Hollande a tornat metre sus la taula. L’UDB considèra que las euroregions pòdon donar una clau per desencalar lo debat. Lo partit breton prepausa de reorganizar tota la zòna nòrd-occidentala de la Republica Francesa mejançant quatre grandas regions que remplacen las sièis actualas. Aquelas quatre regions, çò ditz l’UDB, se poirián agropar alavetz en una sola euroregion que lor permetèsse de bastir d’estrategias de desvolopament partejat”.
 
L’UDB fa partida de la Federacion Regions e Pòbles Solidaris (RPS), que cèrca d’èsser presenta un còp de mai dins lo Parlament Europèu amb la figura de François Alfonsi, eurodeputat pel Partit de la Nacion Còrsa (PNC). Alfonsi foguèt elegit en 2009 dins las listas conjonchas amb Euròpa Ecologia, e ara se presenta tornarmai coma candidat pas solament del PNC, mas tanben d’RPS, dins la circonscripcion sud-orientala.
 
 
 
 
 
 
 
 
Aqueste article es adaptat de Nationalia, amb qui Jornalet a un acòrdi de cooperacion.