Los caps opausants d’Ucraïna an refusat la propòsta del president Viktor Ianukovych per arrestar la revòlta. Arsenii Iatzeniuk, èx-ministre dels afars exteriors e actual dirigent del partit opausant de l’èx-primièra ministra Iuliia Tymoshenko, amb l’èx-boxaire Vitalii Klychko, an refusat l’ofèrta del govèrn ucraïnés d’intrar dins l’executiu coma primièr e viceprimièr ministre respectivament. Los caps opausants an dich que vòlon que se convòque d’eleccions. Los manifestants de la Plaça de l’Independéncia de Kyiiv an mostrat lor gaug en tot saber la nòva.
 
Lo president ucraïnés ofrissiá tanben als opausants de modificar las leis qu’eles considèran “dictatorialas”, e que provoquèron l’esclatament de las susmautas fa una setmana. Ofrissiá tanplan una amnestia pels detenguts e la creacion d’un grop de trabalh per tornar a la constitucion de 2004. De mai, demandava als opausants de s’engatjar a demandar a lors partisans de susprendre las protèstas per carrièras.
 
Las negociacions contunharàn e, dimars que ven, lo president ucraïnés farà una nòva propòsta als opausants.
 
La proposicion de Ianukovych arribava après mai d’afrontaments entre los policièrs e los manifestants e après d’assauts venent dels opausants, qu’an menat de sètges contra de bastissas governamentalas a Kyiiv e dins un desenat de mai de vilas.
 
Los opausants se tenon dins lors revendicacions. Demandan de tornar a la constitucion de 2004 per que lo primièr ministre siá causit pel Parlament e non pas pel president de la republica. Demandan tanplan la convocacion d’eleccions presidencialas immediatas, ongan, e mai la liberacion de l’èx-primièra ministra Iuliia Tymoshenko, qu’es en preson per “abús de poder” dins l’afar de la disputa del gas amb Russia. Son atanben partisans de tornar dobrir las convèrsas amb l’Union Europèa, interrompudas pel president Ianukovych quand signèt d’acòrdis comercials amb Russia.
 
 
Aperaquí 200 policièrs atrapats e desarmats
 
Las tensions contunhan en essent fòrtas. De centenats de manifestants entornegèron ièr dos centenats de policièrs antisusmautas (vidèo). Lo sètge se passèt al centre dels congrèsses de Kyiiv, conegut coma l’Ostal Ucraïnés, ancian Musèu Lenin. Divèrses grops opausants bloquèron totas las sortidas de la bastissa amb la tòca d’anullar la capacitat d’accion dels policièrs antisusmautas qu’èran intrats per, presumidament, atacar los manifestants. L’operacion se virèt contra los policièrs que se vegèron atrapats dedins. Après fòrça tensions, los manifestants permetèron als policièrs de sortir en daissar lors armas dintre. Qualques unes èran grèvament ferits.