De desenats de manifestants opausants intrèron ièr dins la bastissa del Ministèri de la Justícia ucraïnés, a Kyiiv, e l’ocupèron. A l’entorn levèron de barricadas fachas amb de nèu, de contenedors e de sacs de sabla. Los responsables afirman que s’agís d’un “acte simbolic” e qu’agiràn pas amb violéncia; mas la ministra de la justícia, Olena Lukash, a ja dich que se los manifestants quitavan pas la bastissa, declarariá l’estat d’emergéncia.
 
Las susmautas s’estendon ja al delà de Kyiiv e los manifestants opausants an ocupat d’edificis municipals dins un desenat de vilas; e non solament a l’oèst del país, que la populacion i es majoritàriament pròeuropeïsta, mas tanben dins la zòna orientala, tradicionalament amb de bons ligams amb Russia e ont lo president Viktor Ianukovych a recebut mai de sostens.
 
L’oposicion refusèt la dimenjada passada las propòstas del president ucraïnés e exigís que se convòque d’eleccions. La session del Parlament d’uèi poiriá prepausar de nòvas negociacions amb los manifestants opausants.
 
Lo conflicte comencèt en novembre, quand lo govèrn decidiguèt de signar pas l’acòrdi d’associacion amb l’Union Europèa e quand s’integrèt mai a Russia.