Gordon Hempton, fondador de l’ONG One Square Inch, es un ecològ acostic reconegut que s’es interessat, dempuèi de decennis, a ensajar de descobrir los endreches mai silencioses de la planeta. Sembla estonant, mas n’a trobats plan pauc… E n’i a de mens en mens. Perque, segon çò qu’explica, d’espacis ont s’ausisca absoludament pas jamai res, ne demòra pas mai cap. La rason principala son los avions, que subrevòlan la planeta practicament pertot.
 
Ça que la, Hempton revèla que i a encara qualques endreches d’almens 3100 quilomètres cairats ont i a lo silenci absolut pendent d’intervals de quinze minutas: ne compta un dotzenat en America del Nòrd, lo continent ont mai de recèrcas a fach, mas n’a detectats tanben un ponhat en America del Sud, en Euròpa, en Asia, vèrs lo Pòl Nòrd e en Antartida.
 
Mas quitament lo silenci dels espacis tant isolats e luenchencs es sovent trencat per las rotas aerianas. Aquò se passa al nòrd de Canadà, en Siberia e dins lo desèrt de Sahara.