Lo Papa Francés liberèt la dimenjada passada doas palombas de la patz en solidaritat amb Ucraïna, per demandar que s’arturèsse la violéncia en aquel país. Mas foguèron atacadas per dos aucèls mai grands sus la quita plaça de Sant Pèire del Vatican.

Las doas palombas blancas, simbòl de la patz, s’envolèron dempuèi lo balcon, lançadas per d’enfants,  pendent una pregària de l’angèlus, la dimenjada passada. Lo pontife demandèt un dialòg constructiu per n’acabar amb la crisi ucraïnesa.
 
Mas una gavina e un corbàs apareguèron sus la plaça e ataquèron las palombas. L’imatge, pro eloquent, s’interpretèt endacòm en clau metaforica.
 
Se desconeis la portada de l’atac, mas las palombas capitèron de fugir.