País Nòstre apela a un recampament dijòus 31 de mai per la situacion de l’occitan dins l’academia de Montpelhièr. Segon País Nòstre e lo CREO Lengadòc, lo rectorat de l’academia es a suprimir de pòstes. Al delà los conselhèrs pedagogics d’occitan dels departaments d’Aude e de Gard seràn pas reemplaçats quand seràn en retirada. 

“Dijòus 31 de mai deu acampar lo "Conselh Academic” e serà lo moment de manifestar”, çò ditz País Nòstre qu’apela a un recampament a 10h30 davant lo Rectorat, 31 carrièra de La universitat, Montpelhièr.
 
Segon lo CREO Lengadòc, lo rectorat de l’academia de Montpelhièr a anonciadas de mesuras que meton en perilh l'ensenhament de l'occitan.
 
Demest aquelas mesuras se parla de la supression d’un emplec a miei temps d’animacion pedagogica, en foncionant dempuèi 1982, suls mejans especifics atribuits pel ministèri pel desvolopament especific de las lengas regionalas. S'agís d'un pòste que permetiá de metre en marcha los projèctes pedagogics del primièr e del segond gra, amb l’ajuda de las collectivitats territorialas.
 
Al delà, se pretén redusir considerablament la mejana d'accion de l'encargat de mission academica e las siás foncions de responsabilitat, mai que mai sus las gestion dels mejans e la seguida dels ensenhaments.
 
Son tanplan menaçats los pòstes dels conselhièrs pedagogics dels departaments d'Aude e de Gard, vist que i après la lor retirada seràn pas remplaçats.
 
Per tot aquò, lo CREO Lengadòc lancèt una peticion en linha que los signaires demandan al rector de l'academia de Montpelhièr de tornar pensar las decisions, perque aurián de consequéncias desastrosas sus l'existéncia de l'ensenhament de l'occitan.
 
Al delà, s'a mandat tanben una lètra a las autoritats en lor explicant la trajectòria de l'ensenhament de l'occitan a l'academia de Montpelhièr e las menaças que lo fan perilhar.