La dimenjada de Manchester es estada magica pels Dracs catalans. Pel compte d’aquela jornada de fèsta, l’equipa catalana rescontrava la formacion londoniana dels Broncos. Los sang e aur prenián lèu-fait los davants amb un ensag signat pel pilar Lopini Paea, puèi lo dobertura Leon Pryce marcava dos còps e lo capitani Remi Casty i anava del siu.
Scott Dureau transformava e los Dracs menavan 24-0 a la pausa. Mas la represa foguèt dificila pels catalans que vegèron los Angleses tornar en un quart d’ora a 24-18. A l’ora de jòc, lo capitani Casty relançava la maquina catalana e marcava son segond ensag. Leon Pryce traucava la defensa britannica e Steve Menzies marcava abans un ensag signat per Jamal Fakir qu’aviá pas lo temps de manifestar sa jòia vist que sa camba plegava jol pes dels defenseires al moment de marcar.
Levat aquela nafradaura, la victòria es bèla 42-18 e permet als catalans de se trapar en tresena posicion al classament aprèp la desfacha d’Huddersfield facia a Salford 38-34. E justament, los Dracs van rescontrar Dalford aqueste divendres 1èr abans la recepcion bèla lo dissabte 9 de junh de vèspre de Wigan sus la pelena d’un estadi de campions: aquel de la Mosson a Montpelhièr.
Autras resultas del Magic Week-end qu’a ramosat mai de 60 000 espectadors dins l’estadi de Manchester City: St-Helens-Wigan: 16-42; Bradford-Leeds: 22-37; Hull FC-Hull KR: 30-32; Warrington-Widnes: 68-4 ; Castlefod-Wakefield: 26-32.
La primièra dimenjada de junh es plaçada jol signe de l’Ententa cordiala amb las quatre confrontacions de la Copa Europèa entre los 4 primièrs del campionat nòstre e quatre formacions de League One. Atal, Tolosa reçauprà Halifax dissabte a 3 oras als Minimes. A Carcassona, los campions espèran las Aglas de Sheffield dissabte a 7 oras del vèspre a Domèc: canaris contra aglas, aquò promet! Avinhon jòga a Leigh dissabte e Pià rescontrarà sus lor pelena los venceires 2011 de la League One: Featherstone. Al país, las competicions de Federala se perseguisson : en Nacionala 2, las mièja-finalas se tendràn entre Vilagalhenc-Argon e St-Laurenç de la Salanca d’una part e Trentels e El Soler d’autra part.
La finala de Nacionala 3 opausarà Vilanòva de Menerbés e Lescura-Valderiés. Los minimes de l’Ostal dels Joves de Carcassona, ja venceires de la Copa de França, jogaràn la mièja-finala del campionat en dobertura d’ASC-Sheffield.
Alan Roch
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari