Se presentèt la setmana passada a L’Alguer, la vila catalanofòna de Sardenha, un ret de comerçants que vòlon promòure l’usatge quotidian del catalan dins lors activitats comercialas. L’associacion es formada per un vintenat d’entrepreneires, artisans e comerçants de la vila e cèrcan de rendre abitual l’usatge del catalan dins lors establiments.
 
Lo primièr projècte qu’an fach es lo labèl Botigueta, qu’indica quals son los establiments que fan partida d’aquel ret e que convida los clients a emplegar la lenga locala.
 
En mai d’aquò, la prima que ven an previst d’organizar d’activitats restacadas a la gastronomia, la cultura, lo jòc e l’espòrt per convidar los alguereses e los toristas vesitaires a emplegar la lenga. Aquelas activitats poirián coïncidir amb la campanha electorala de las eleccions municipalas, qu’a L’Alguer se debanaràn lo 25 de mai.
Lo primièr president de l’associacion Botigueta es l’istoric entrepreneire alguerés Domenico Manca, proprietari de la societat d’òli San Giuliano. L’iniciativa es assistida scientificament per l’Ofici Lingüistic de la Comuna de L’Alguer e per la delegacion de la Generalitat de Catalonha dins la vila.
 
Aquela iniciativa poiriá ben encoratjar de comerçants de qualque vila occitana a far quicòm de similar.