Lo 26 de genièr passat se debanèt a París una manifestacion de 17 000 personas segon la polícia e 120 000 segon los organizaires, que demandèt la demission de François Hollande, a l’iniciativa d’un nòu collectiu francés d’extrèma drecha nomenat Jour de Colère (jorn de colèra).  E mai se s’agís d’una nòva de fa mai de doas setmanas, Pascau Sebat nos prepausa de tornar sus aquela informacion que los mèdias franceses l’an tocada a la lèsta e que Jornalet ne parlèt pas.

Lo 26 de genèr, a París, ua manifestacion de 17 000 personas segon la polícia e 120 000 segon los organizaires que demandè la demission de François Hollande a l’iniciativa d’un collectiu navèth dens l’extrèma dreta francesa: Jour de Colère (dia de colèra) . Aqueste collectiu que sembla de voler federar l’extrèma dreta contra François Hollande en balhant un vam navèth a l’oposicion au maridatge per tots.
 
“Qu’avem tots aumensh ua rason d’estar en colèra contra aqueste gouvernament qui n’escota pas lo pòble, matraca los contribuents, ahàmia los nostes païsans, entèrra la nosta armada, libèra los delinquents, desorienta los nostes mainatges, perverteish lo noste sistèma escolar, demeseish  las nostas libertats, assassina la nosta identitat, destruseish las nostas familhas”, ce ditz lo manifèst deu movement.
 
Un discors plan lis e consensuau si’u comparam dab çò qui’s digó e qui’s hasó per las carrèras de París aqueth dimenge plojós: eslogans coma “Jornalistas, hilhs de putas”, “judius hòra França”, “Faurisson qu’a rason” o “CRS, revira’t: la racalha qu’ei darrèr tu” que s’i hasèn enténer.
 
Los jornalistas oficiaus de las cadenas francesas n’èran pas plan venguts dens lo cortegi e ua esquipa de Canal Plus qu’estó fisicament agressada per manifestants.
 
Un reportatge d’Independenza TV[1] que muisha la preséncia de monde e d’organizacions hèra desparièrs: joens opausants au maridatge per tots de l’anar meilèu borgés e tranquil, dont ua ditz que ne vòu pas deishar François Hollande destrusir la familha, Civitas, Printemps Français, e un cortegi aperat Dissidence Française darrèr ua banderòla “Vivement le putsch” (“que’ns triga lo putsch”).
 
Un òmi davant la banderòla, qui tien un megafòn, que n’explica mei:  “Vivement le putsch, qu’ei simple: la tòca qu’ei d’inocular a la populacion l’idèa d’un còp d’estat militar, per’mor uei, qu’ei la sola solucion au noste vejaire. Lo vòte qu’ei tot de bon inutil. Fin finala qu’ei lo quite sistèma qui s’arrenovèla per eleccions de farlabica e donc l’armada uei qu’ei la sola institucion qui n’ei pas dissolvuda com la familha e qui pòt reagir en hant càder lo regim... e restaurar l’Estat, solide.”
 
A un aute endret deu seguici, un joen que hè un salut nazi.
 
Los mèdias francés que parlèn hèra chic d’aquera manifestacion, çò qui ne manquèn pas de remarcar los blogaires simpatizants. Paur d’un subjècte complicat, volontat de non pas hà’s relais de paraulas xenofòbas o extremistas, interès superior entà la vita privada deu president e de la soa èx... Que’ns podem interrogar sus la loa motivacion a non pas acordà’i importància e l’emission Le secret des sources sus France Culture que consacrè ua òra a analisar lo tractament minimalista d’aqueste eveniment e d’autes ligats a l’extrèma dreta per la premsa francesa.
 
 
 
 
Pascau Sebat

_____
^[1] N'èi pas podut destriar la relacion entre Independenza TV e los manifestants. Que's defineishen com jornalistas ciutadans e "desintoxicacion mediatica".