Comencèt ièr a Niça la Setmana Còmi. Es un rescontre que cèrca de metre en evidéncia las similituds e divergéncias del desvolopament del teatre dins una lenga minorizada al País Còmi e dins la Comtat de Niça, de comparar de contèxtes istorics e lingüistics e de s’enriquir mutualament de la coneissença de las arts de l’espectacle en còmi en en occitan.
 
L’eveniment ven en seguida d’un festenal de teatre que se passèt en setembre de 2009 a Syktyvkar, ont lo Teatre Niçard de Francis Gag joguèt una pèça en lenga occitana del temps que lo Teatre Nacional de Còmi faguèt un espectacle dins sa lenga.
 
Dins lo quadre d’aquesta setmana, un collòqui internacional cèrca d’aprigondir aquelas questions, e se representarà d’espectacles en occitan niçard e en còmi.
 
Al programa i a de teatre e de collòquis internacionals aquestes dijòus e divendres que venon de 9h a 18h al Teatre dau Grand Castèu de Vauròsa (Universitat de Niça-Sofia-Antipòlis), al 28 de l’Avenguda de Vauròsa (mai d’informacions aquí).
 
Los còmis son un pòble qu’abitan en Russia (en la Republica de Còmi, en la Província de Murmansk e dins los districtes autonòms de Khantia-Mansia e Iamalonenetzia). Es una nacion mai que mai tradicionalista que ten una economia de substiténcia basada sus l’elevatge dels rangièrs. Parlan una lenga del grop permian de la familha finoogrica. Segon de donadas de 1989, 74,6% dels còmis parlan la lenga, qu’es ensenhada a las escòlas.