Era association Eth Ostau Comengés qu’é plan coneguda nara sua accion de cuelhuda e de transmission dera cultura orala deths Pirenèus gascons. Qu’a ja produit siés documentaris en occitan sus era vita rurala en Comenge e Coserans e qu’organiza cada an un tepèr de projeccions.
 
Nà començar era annada 2014, que venc de publicar un libe-CD bilingüe occitan-francés, Conde, condilhon, que’s presenta coma un arrecuelh de condes tradicionaus. Que mos parla de dus mainatges un pòc guèrles, Julian e sa petiva sòr Miriam, que passan era net ath çò de Pepin e Memina. Coma n’an cap plan dromèra, que’s hèn condar quauqu’un conde deth país. Que van atau arrescontrar lops ahamats, un tropèu de crabas, ua mandra, ua saumeta, un esclopèr, innocents, lairons, broishas, hadas, oelhèrs, guerrèrs sarrasins e tanben un pelharòt que camina peras nòstras montanhas!
 
Aqueris condes que son estadis cuelhudis peths enquistaires deth Ostau Comengés en Larbost (Era saumeta de Poradet), pera Vath deth Arbàs (Conde, condilhon; Eths lops e eth viulon; Eths de Portèth), a Vathmala (Eras hadas deth Taishon; Eths esclòps de Vathmala; Eras Oelhas Anticas), a Aulús (Eth lops e eras crabetas; Joan Bèstia; Eth sabat deras broishas).
 
Dab eths dessenhs deth illustrator Crestian Louis, eths sòns tèxtes bilingües e eth sòn CD, Conde, condilhon qu’é hèt naths petivis coma naths granis, que sàpian eth occitan un pòc, fòrça, passionadament, coma pècs o bric...
 
 
 
 
JPF
 
 
_____
FERRÈ, Joan-Pau & RESPAUD, Pascala. Conde, condilhon. Edicion Eth Ostau Comengés, colleccion Oralitat de Gasconha nº19. 12 èuros. Illustracions de Crestian Louis.