Los grops bretonistas vòlon aprofechar la pòrta dobèrta per Hollande sus la reorganizacion de la mapa regionala. Lo Léger Atlantic, istoricament breton, fa partida de la region dels Païses de Léger.

Los grops Bretanha Reünida e 44=Breizh an convocat una mobilizacion per quichar lo govèrn francés en favor de la reünificacion de Bretanha. Jol lèma “Ni statu quo, ni Grand Oèst”, los dos collectius considèran que cal aprofechar l’escasença per que la reünificacion del país “se torne pas barrar ni ignorar per l’enen còp”. La manifestacion se debanarà lo 19 d’abril a Nantas (capitala istorica de Bretanha, mas a l’ora d’ara compresa dins la region dels Païses de Léger).
 
La convocacion arriba après que lo president de França, François Hollande, aja recuperat un projècte del sieu predecessor a la carga, Nicolas Sarkozy, per reorganizar la mapa regionala. Hollande defend la reduccion del nombre de regions oficialas a un quinzenat, e aquò poiriá afectar Bretanha. D’un costat, poiriá dobrir la pòrta a la reünificacion: es a dire, que lo departament de Nantas, lo Léger Atlantic, tornariá far partida de Bretanha amb los autres quatre departaments que i son ja. Mas de l’autre, tanben se poiriá passar que la reduccion de regions se faguèsse simplament mejançant la fusion de las actualas regions de Bretanha, Païses de Léger e Peitau-Charantas, çò que fariá una nòva region nomenada Grand Oèst.
 
Lo movement breton s’opausa tant a la situacion actuala coma a la desaparicion de Bretanha dins un conglomerat mai grand coma lo Grand Oèst. Fins a uèi, los limits d’aquel Grand Oèst se son utilizats coma circonscripcion electorala per las eleccions europèas.
 
En 2008, a l’entorn de 10 000 personas —segon l’organizacion— participèron a una manifestacion a Nantas en reclamant la reünificacion de Bretanha. Dins las annadas seguentas se son debanats d’autres acamps amb la meteissa tòca.
 
 
 
 
 
 
Aqueste article es adaptat de Nationalia, amb qui Jornalet a un acòrdi de collaboracion.