Lo govèrn de la Nòva Zelanda es a considerar de cambiar lo drapèl del país, per i eliminar la Union Jack, lo simbòl britanic que fa partida de la bandièra de l’archipèla, e mai s’es un país independent dempuèi 1907. Aital o anoncièt lo primièr ministre neozelandés, John Key.
 
Los principals partits politics sostenon lo cambiament, mai que mai per enterrar los darrièrs vestigis de l’imperialisme britanic, e mai se la reina d’Anglatèrra es la cap de l’estat. Al delà, la bandièra actuala es fòrça similara a l’australiana e incorpòra pas cap de simbòl maòri. Lo debat es dobèrt.
 
Lo partit de Key, conservator, prepausa lo drapèl de la falguièra argentada, emplegada, entre d’autres, pels suportaires dels All Blacks, l’esquipa nacionala de rugbi. Hone Harawira, cap maòri del Partit Mana, prepausa la bandièra maòri, nomenada Tino Rangatiratanga, e mai s’es pas contra la bandièra de la falguièra. D’autres creson que lo nòu simbòl nacional deuriá incorporar qualque element maòri.
 
Ça que la, Harawira planh que lo primièr ministre emplegue lo debat de la bandièra per desviar l’atencion d’autres problèmas coma l’inegalitat sociala. Un maòri ganhariá 6000 dolars neozelandeses de mens que la mejana estatala segon las donadas del cens de l’an passat, e las diferéncias son a créisser.
 
 
 
 
_____
Divèrsas propòstas de bandièra
 
The Sidney Morning Herald: New Zealand looks to ditch the Union Jack from flag
 
Nationalia: El govern de Nova Zelanda proposa un referèndum per a eliminar la Union Jack de la bandera del país