A partir dau mes de març, los nenets a mand de nàisser dins una de las tres maternitats dau País de Vinhana poiràn èsser seguits medicalament dau ventre de la mair d’aicí a lor majoritat.
 
Los mètges cerchaires dau CHU de Limòtges prepausan una iniciativa ambiciosa e unica: sègre los petits de las maternitats limotjaudas (Clinica daus Esmautaires e Espitau de la Maire e de l’Enfant) e de l’Espitau de Sant Junian per recensar los eveniments que lor van ’ribar davant lor naissença d’aicí a lors dètz e uech ans. Yves Aubard i trabalha dempuei dos ans e explica son objectiu: “A chasque còp que se fai un estudi, manca totjorn la seguda de las donadas. Adonc, au delai de l’estudi sabèm ren dau seguiment de la persona. I a pas un retorn. Lo problèma es recurrent. L’idèa dau projècte es d’aver un gatge que respond a totas las questions que siá sus lo percors medicau, environamentau o sociau”. Per exemple l’influéncia vertadiera dau telefòn mobil pendent la grossesa. O se los petits que lor mair fuma, e que naisson mai que mai jos las corbas de referéncia per lo pes e la talha, van tornar trapar lor creissença.
 
Los parents seràn sollicitats per que lor petit faja partida de l’estudi. Los cerchaires espèran de trabalhar sus 3000 enfants de las 4500 naissenças annualas. Collectaràn las donadas de la grossesa (donadas intrauterinas), de l’acoijament, puei, tots los ans. Daus questionaris seràn adreiçats a las familhas per obténer las donadas concernissent lo petit mai son environament sòcioculturau.
 
 
 
 
Maime Caillon