Dempuei lo 5 de febrier passat, en Bòsnia, de manifestacions violentas se debanan un pauc pertot còntra lo govèrn federau. Es la protèsta sociala mai importanta per aqueu país dei Balcans dempuei qu’obtenguèt son independéncia en 1992.

Per aquelei que s’interèssan de près a Bòsnia, leis eveniments actuaus son pas una vertadiera suspresa. En mai d’aver totjorn de conflictes politics amb la partida sèrba de l’estat, Bòsnia deu tanben far fàcia a una situacion economica catastrofica. Quasi la mitat de la populacion bosniana es uei sens emplec, una chifra mai importanta encara per lei jovei generacions, qu’aquelei que rèstan totjorn au país an sovent enveja de partir.
 
La misèria sociala es, çò sembla, venguda insuportabla per lo pòble bosnian que manifestèt divendres passat dins lei mai grandei vilas dau país. A Sarajevo, la capitala, lei manifestants s’ataquèron au bastiment de la presidéncia que foguèt destruch en partida per lei flamas, mai tanben ai locaus de dos partits politics reputats nacionalistas: l’SDA e l’HDZ. Sus la tela florisson lei vidèos d’afrontaments amb la polícia. Foguèron recensats 150 a 200 nafrats per la fin de setmana passada. Tanben un deis estigadors dei primierei manifestacions, sòci dau grop UDAR, foguèt arrestat e bastonat per lei fòrças de l’òrdre. La revòuta populara es pron importanta per que la premsa locala e internacionala parle de “primtemps bosnian”.
 
Se lo govèrn de Bòsnia acusa lei manifestants d’èstre manipulats, aquelei darriers denóncian la corrupcion generalizada deis elèits mai tanben la gestion publica desastrosa deis autoritats localas. De nombroseis entrepresas foguèron privatizadas e lo govèrn foguèt dins l’incapacitat de protegir lei trabalhadors e de far aplicar lo drech a aquelei nòus investidors qu’an licenciat en massa. Lei sindicats, acusats de far partida dau sistèma de corrupcion bosnian, son tanben la cibla dei protestators.
 
A Tuzla, vila dau nòrd dau país ont a començat lo movement, lo primier ministre dau canton a demissionat, coma son omològ dau canton de Zenica, limitròf de Sarajevo. Es segur qu’aquelei cambiaments politics menors bastaràn pas per amaisar la colèra prefonda dei bosnians qu’an perdut tot espèr dins l’avenidor. Sembla d’èstre pas que lo començament d’una granda remesa en causa de la gestion politica d’un país qu’es encara marcat per leis annadas de guèrra civila.




Matieu Casanòva