An començat los 22s Jòcs Olimpics d’Ivèrn a Sochi, a la riba nòrd de la Mar Negra. Aquela vila toristica d’aperaquí tres cents mila abitants es plaçada al pè de las turbulentas montanhas de Caucàs e per aquò pas es estranh que se fondèsse en l’an 1838, en plen empèri tzarista rus, coma fòrt amb lo nom d’“Alexàndria”. Las relacions dificilas entre la Russia crestiana e los pòbles musulmans de la region se mantenon un sègle e mièg puèi, coma o demòstra la sagnosa guèrra de Chechenia e lo creissent conflicte en Daguestan... o  ben lo fach qu’en aquel territòri de confinha russa i aja la densitat mai nauta del Mond d’estats independents de facto, segon çò que ne rapòrta lo jornal catalan Vilaweb.
 
A qualques centenats de Sochi podèm trobar quatre dels dètz estats independents non inscriches a l’ÒNU, mas reconeguts per qualques païses. De fach, a solament quatre quilomètres del sit olimpic i a la frontièra amb Abcazia, una republica que se declarèt independenta de Georgia en 1999 e qu’es reconeguda per Russia e per quatre autre estats membres de l’ÒNU: Nicaragua, Veneçuèla e las illas pacificas de Nauru e Tuvalu. Son los meteisses païses que reconeisson la Republica d’Ossetia Meridionala, tanben separada de Georgia dempuèi 1991 e que, coma Abcazia, a experimentat d’episòdis de guèrra amb la participacion de fòrças russas contra l’armada georgiana.
 
Un pauc mai luènh trobam encara dos estats autodeclarats: al sud-èst, lo Naut Karabagh (o Artsakh), un territòri de majoritat armènia e crestiana, administrativament enclavat dins Azerbaitjan qu’es musulman; e a l’oèst i a Transnístria, una estrechissima republica de majoritat russofòna en Moldàvia que seguís lo cors del riu de Nistru. Aquelas doas republicas se declarèron independentas en 1992 e en 1990, respectivament, e son solament reconegudas per Abcazia e per l’Ossetia Meridionala.
 
Sens quitar Moldàvia, i poiriam encara apondre lo cas del territòri autonòm de Gagauzia. Lo 2 de febrièr passat, los cent seissanta mila gagauzes (un pòble de tradicion crestiana e de lenga turquesa) decidiguèron per una larga majoritat, en un referendum consultatiu, de declarar l’independéncia se Moldàvia se jonhiá a Romania dins l’avenir, e tanben de se sarrar de l’union doanièra promoguda per Russia en luòc d’avançar cap a l’integracion dins l’Union Europèa,
 
Qualques analistas interprètan lo resultat del doble vòte gagauz coma un laboratòri de çò que se pòt passar dins l’Ucraïna vesina, ont dempuèi novembre i a una division de facto del país entre l’oèst qu’es europeïsta, catolic e ucraïnofòn, e l’èst qu’es russista, de tradicion ortodòxa e russòfon.