Actualitats
França, Itàlia Espanha e Alemanha an expulsat los lors ambaissadors de Siria
Russia a demandat a Koffi Annan, enviat especial de l'ONU, una investigacion imparciala del masel d'Al Haula
François Hollande decidiguèt ièr dimars d'expulsar l'ambaissadora de Siria en França, Lamia Shakkor. Segon Le Monde, AFP e Reuters, lo president francés declarèt atanben que lo "grop dels amics de Siria" s'amassariá a París al començament de julhet. L'agéncia de premsa alemanha DPA a revelat que Berlin tanplan a decidit de reexpedir l'ambaissador de Siria en Alemanha.
Lo president francés anoncièt ièr que l'ambaissadora es expulsada en responsa al masèl que se debanèt la dimenjada passada dins la vila d'Al Haula (Houla) que provoquèt la mòrt de 108 personas, dont 49 enfants. Lo president a precisat que Lamia Shakkor "es tanben ambaissadora al ras de l'UNESCO" e qu’"aquò aurà doncas de consequéncias sus la rapiditat d'execucion d'aquela decision".
Hollande apondèt qu'aviá agut "una convèrsa ièr [diluns] amb David Cameron, lo primièr ministre britanic. Laurent Fabius, ministre dels afars estrangièrs, a agut una discussion amb lo secretari general de las Nacions Unidas e nos sèm convenguts d'un cèrt nombre de pressions a exercir sus Siria". Lo cap de l'Estat francés declarèt que s'agissiá pas d'una decision unilaterala de França, mas d'una decision concertada amb los [sieus] partenaris".
Hollande atanben a indicat que "la reünion dels amics de Siria se deurà debanar al començament del mes de julhet". "Sèm tanplan en discussion amb Russia, que jògue un ròtle, e m'entrevistarai amb lo president Putin divendres", apondèt lo president francés.
Lo govèrn espanhòl decidiguèt tanben d'expulsar l'ambaissador sirian a Madrid, Hossam Edin Aala, en responsa al masèl d'Al Haula.
Lo Ministèri d'Exteriors d'Itàlia a fach la meteissa accion e l'a justificada en disent qu’”aital, lo govèrn italian a reïterat la siá indignacion per la violéncia ferotja contra la populacion civila, qu'es responsabilitat del govèrn [sirian]"
Alemanha a tanplan expulsat l'ambaissador sirian, Radwan Lufti. Segon de mèdias locals, lo govèrn li comuniquèt qu'aviá 72 oras per quitar lo país.
Del sieu costat, lo Reialme Unit expulsarà qualques diplomatics del govèrn d'Al Assad, malgrat que l'ambaissada serà pas barrada.
Per çò qu'es de Russia, lo ministre dels afars estrangièrs, Sergei Lavrov, a parlat per telefon amb Koffi Annan. Lo ministre rus a demandat a l'enviat especial de l'ONU "una investigacion imparciala" del masel d'Al Haula. "Çò qu'ara cal es far una investigacion imparciala e objectiva de totas las circonstàncias sus çò que se passèt jos la proteccion de la mission observaira de l'ONU en Siria", a soslinhat Lavrov, segon una nòta que la cancelariá russa a mandat als mèdias.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari