103 personas mòrtas, 99 passatgièrs e 4 membres d’esquipatge, es lo bilanç d’un grèu accident d’avion militar que se passèt ièr al nòrd-èst d’Argeria, a qualques cent quilomètres de la frontièra amb Tunisia.
 
“Avèm trobat un subrevivent e las recèrcas contunhan dins una zòna d’accès dificil”, çò declarava arser a la ràdio publica argeriana un oficièr de la proteccion civila. D’efièch l’avion, del tipe C-130 Hercules, s’espotiguèt dins las montanhas près d’Umm Al Bawaqi (Oum El Bouaghi), un airal despoblat e d’accès malaisit. Transportava de militars e lors familhas.
 
Aurián provocat l’accident los auratges, de vent e fòrça nèu. Segon la ràdio argeriana, la comunicacion entre la tor de contraròtle e l’esquipatge s’interrompèt al moment que l’avion comencèt la manòbra d’aterratge sus l’aeropòrt de Constantina, a qualques 50 quilomètres del luòc de l’accident.



Crash en Algérie: "des militaires et familles...per BFMTV