Lo Partit Popular (PP) a emplegat dimars passat sa majoritat absoluda per aprovar una proposicion de lei que limitarà lo principi de justícia universala, es a dire, que los jutges espanhòls poiràn pas mai perseguir de crimes comeses en defòra de l’estat espanhòl.
 
Al delà, la proposicion de lei demanda d’arturar còp sec los procèsses ja dobèrts. Aital lo PP a obtengut d’arrestar lo procès de la justícia espanhòla contra l’èx-president chinés Jian Zemin coma presumit responsable de genocidi en Tibet en los ans 1990. En mai d’aquò, aquel vòte farà cessar los procèsses que vòlon esclarzir los crimes de Pinochet en Chile e la responsabilitat de la mòrt del jornalista espanhòl José Couso en Iraq, imputada a l’armada estatsunidenca.
 
Totes los autres partits politics votèron contra, e quitament denoncièron qu’es inconstitucional d’arturar los procèsses judiciaris en cors. Mas se critiquèt, mai que mai, la preissa del PP per aprovar aquela proposicion just l’endeman que la justícia espanhòla confirmèsse l’òrdre de detencion internacionala contra l’èx-president chinés Jian Zemin e l’èx-cap de govèrn Li Pen.
 
Lo govèrn chinés, que s’èra manifestat “extrèmament malcontent” per la decision de la justícia espanhòla, se felicitèt pel vòte e condemnèt los independentismes, tant en Tibet coma endacòm mai. Al delà, Pequin a exigit que lo govèrn de Mariano Rajoy esclarzisca la posicion oficiala d’Espanha.
 
La session parlamentària comptèt amb la preséncia de la familha de José Couso, lo jornalista assassinat en Iraq en 2003, que planguèron que lo PP s’agenolhèsse davant las grandas poténcias coma China e los Estats Units.