Lo PSC demandèt al Parlament de Catalonha que se respectèsse la Val d’Aran coma territòri singular. Lo govèrn catalan respondèt que se respècta e se respectarà lo drech de decidir d’Aran, e reprochèt als socialistas de voler per Aran çò que vòlon pas per Catalonha.
Lo Partit dels Socialistas de Catalonha (PSC, branca catalana del PSÒE) demandèt ièr al Parlament de Catalonha que la Lei dels Govèrns Locals, qu’es a se lai tractar, respècte la Val d’Aran coma “territòri singular”, pr’amor que considèran que la nòrma es insufisenta. Lo PSC donèt aital seguida a la demanda de sos sòcis d’Unitat d’Aran (UA, branca aranesa del PSC e del PSÒE). “Era autonomia aranesa se trape menaçada pera uniformizacion comarcau e era naua lei des Govèrns Locaus dera Generalitat, que prevé d’includir era Val ena division deth territòri en vegueries damb eth silenci complice deth govèrn aranés”, çò diguèt Francés Boya, secretari general d’UA.
La vicepresidenta catalana, Joana Ortega, reprochèt als socialistas lor chepic sul “drech de decidir” dels araneses del temps que, per eles, lo dels catalans deu èsser ligat “als mandats e las alianças del PSC amb Madrid”, en allusion als socialistas espanhòls (PSÒE). Ortega diguèt tanben que la Generalitat de Catalonha respectariá totjorn que los araneses exerciguèsson lor drech de decidir, de la meteissa manièra que vòl qu’Espanha respècte lo dels catalans.
De fach, lo president Artur Mas diguèt lo 2 de febrièr passat, en Aran, que se los araneses vòlon decidir lor avenir, lo govèrn catalan empedirà pas que se debane un vòte.
La deputada socialista, Núria Parlon, repliquèt que son partit es ben partisan del drech de decidir “mas dins l’encastre de la legalitat e de l’acòrdi”.
Per çò qu’es del chepic d’Unitat d’Aran e, doncas, del PSC, lo Sindic d’Aran, Carlos Barrera, declarèt a Jornalet qu’a pas cap de sens tant qu’“era Lei des Govèrns Locaus respècte eth Regim Especiau d’Aran e, ath delà, aquera lei demorarà sens efèit quan eth Parlament aprovarà era naua Lei d’Aran que ditz qu’Aran non pòt èster includit en cap de division territoriau que non sigue era madeisha”. De fach, aquela nòva Lei d’Aran, qu’es a se bastir al Parlament de Catalonha, deurà decidir la territorialitat del país occitan, al dessús de las leis catalanas.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Aquestes deu PSC semblan se pas cansar de arribar a nòus nivèls de cinicisme, demagogia i ipocrisia.
Res de nòu jol solelh.
Quina marrida fe ! Quina ipocrisia…
Dins l'istòria, i es una tendéncia a se recordar solament de minoritats quora son utilas per los autres...
Fa caud al còr de veire que lo PSC se preocupa de la situacion en Val d'Aran !
Cal esperar que portarà aut las colors d'Occitània e que totes los membres del PSC se faràn ambassadors de la causa aranesa e mai largament de la causa occitana, en Catalonha, en Espanha, en Euròpa, per tot !
Cal que s'incriguèsson d'urgéncia als corses d'occitan del CAOC a Barcelona. Fasètz lor passar lo messatge !!! Benlèu descubrirèm d'autors ingenioses demièg els...
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari