Actualitats
Hollande comença de parlar d'intervencion armada contra Siria
Amassarà al començament de julhet totes los qu'an la tòca de "caçar aquel regim"
Lo president francés François Hollande declarèt en una entrevista dimars sus France 2, a prepaus de la crisi siriana, qu'exclusiá pas una intervencion armada se se fasiá jos mandat de l'ONU.
Lo president François Hollande excluguèt pas una intervencion armada contra Siria contra lo govèrn de Bashshar Al Asad jos mandat de l'ONU, segon çò que diguèt dimars, sus France 2. "Una intervencion armada [en Siria] es pas exclusa a condicion que se faga dins lo respècte del drech internacional, es a dire per una deliberacion del Conselh de Seguretat" de l'ONU, çò diguèt.
"Cal convéncer los russes e los chineses" de metre pas lo lor vèto al Conselh de Seguretat a una operacion aital, apondèt Holande, que recebrà divendres a París lo president rus Vladimir Putin.
Evoquèt tanplan una "solucion que seriá pas forçadament militara perque la pression se deu far tre ara per caçar lo regim de Bashshar Al Asad".
"Nos cal trobar una autra solucion. Per aquò amassarai al començament de julhet la Conferéncia dels Amics de Siria", es a dire "totes los qu'an la meteissa vocacion, la meteissa tòca […]: caçar aquel regim", çò apondèt Hollande per qui s'agirà tanplan de "solidarizar l'oposicion" perque "cal pas qui que siá en plaça" del president sirian. "I a doncas una organizacion de l'oposicion "a realizar", perque "siá capabla de se substituir al regim".
Lo president diguèt tanben que Putin, amb China, es "enrèire per çò qu'es d'aquelas questions de sancions". Segon Hollande, lo cal convéncer per "daissar pas lo regim de Bashshar Al Asad massacrar lo sieu pròpri pòble".
Un naut responsable de l'ONU diguèt dimars qu'aviá "de fòrtas suspicions" sus l'implicacion de las "shabbiha", dels milicians en favor d'Al Asad, dins aquel masèl. Del sieu costat, Bashshar Al Asad nega la siá implicacion.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Caçar un govèrn tiranic per instaurar un regim integrista religiós ? Refusar de discutir amb un tiran per n'instaurar un autre ? Qué significan aquelei fadesas ? Ont s'amagan lei vertadièrs interès de l'Occident venau e verinós, sota aquelei bravadas ? Qu'es aquò, "lo pòble sirian" ? Quina es sa lenga ? Qué lo diferencia dau "pòble jordanian", dau "pòble libanés", dau "pòble palestinian" ? Qué ne vira deis eventuaus conflictes entre chiitas, sunitas, crestians maronitas, dins aqueleis parçans, qu'explicarián bensai un pauc mens mau l'arrapadís mortalassièr deu poder actuau au cap de l'estat de Siria ? I a gents que luchan contra aqueu poder, mas quinei son lei motivacions d'aquelei que luchan per eu ? D'Occitània estant, tot aquò sembla foscàs, non ?…
#2 Churia escriver "Intevencion armada imperialistica contra un pais sovran" parier es mai just!
"intervencion armada contra Siria"... Aqueste titol n'ei pas briga corrècte : que caleré diser "intervencion armada contra lo regime sirian d'El Assad"...
Cal far quicòm per Síria mas sens los conselhs de BHL que menarián a daissar un camp de roïnas materialas e moralas.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari