Lo ministre espanhòl de l’interior, Jorge Fernández Díaz, admetèt dijòus passat, davant lo Congrès dels Deputats, que la gàrdia civila tirèt de balas de goma contra los immigrants qu’ensajavan d’intrar dins l’estat espanhòl per la plaja de Ceuta, ont qualques quinze personas moriguèron negadas dins la mar. Segon lo ministre los policièrs faguèron un usatge “proporcionat e dissuassiu” del material antisusmautas e causèron pas eles dirèctament la mòrt dels immigrants. Segon lo ministre, totes moriguèron negats e cap d’eles presentava pas de signes de violéncia ligats a l’usatge de las balas dels policièrs.
 
Los faches se passèron lo 6 de febrièr passat, quand un grop de 200 personas ensagèron d’arribar a Ceuta en traversant la barralha de la plaja de Tarajal. Pr’amor que reüssissián pas, un grop d’eles ensagèt d’i arribar en nadant près de la peirada. Un quinzenat de personas moriguèron, e los subrevivents qu’arribèron a la plaja denoncièron que los agents de gàrdia civila lor avián tirat de balas de goma e de bombas de fum mentre qu’èran dins l’aiga. De son costat, la gàrdia civila justifiquèt l’emplec del material antisusmautas en atribuissent als immigrants una “actitud violenta”.
 
En seguida de l’avalanca de criticas, se difondèt un vidèo, mas los imatges ensenhan pas coma los immigrants arribèron a la mar, ni coma moriguèron ni tanpauc coma agiguèt la gàrdia civila. Sonque s’i vei un agropament de mond, a la lutz del jorn, sus la plaja del costat marroquin, que lançan de pèiras contra la barralha frontalièra, mas lai se vei pas çò que se passèt de nuèch dins la mar. Los subrevivents tornats en Marròc admetèron que qualques unes avián lançat de pèiras contra la barralha, mas que foguèt de ràbia après la tragèdia, quand lor calguèt tirar de l’aiga lors companhs mòrts.
 
Per contra, un vidèo enregistrat per un ciutadan de Ceuta ensenha coma qualques immigrants arribèron fins a la plaja, ont la gàrdia civila los faguèt tornar en Marròc, sens far cap de rapòrt ni seguir lo procediment indicat dins la lei sus los estrangièrs. Segon la version oficiala cap d’eles intrèt pas en territòri espanhòl.
 
Un vintenat d’ONG an denonciat l’accion de la polícia espanhòla, e s’es dobèrta una enquèsta judiciària. Mas lo govèrn espanhòl defend encara los policièrs e la gàrdia civila a menaçat de denonciar las organizacions que los “difamaràn”.
 
Human Rights Watch a denonciat las percaças policièras dels immigrants qu’intran a Melilla e las agressions que patisson. L’organizacion remembra qu’aquelas percaças “contravenon las leis internacionalas e de l’Union Europèa, qu’enebisson als païses de far tornar de personas de fòrça als territòris que fugisson, ont s’expausan a un risc de tractament inuman o degradant”.
 
Un autre ponch d’interrogacion encara dobèrt es la quantitat de personas que moriguèron ailà aquela nuèch. Oficialament, s’es confirmada la mòrt de tretze personas; de fonts de la gàrdia civila e de la delegacion del govèrn espanhòl a Ceuta elèvan la chifra a quinze; e las ONG an paur que sián mai encara.
 

Brussèlas demanda d’explicacions
 
La comissària europèa de l’interior, Cecilia Malmström, se manifestèt ièr “fòrça inquieta” per l’emplec de las balas de goma contra los immigrants e a demandat d’explicacions al govèrn espanhòl per aquel afar, que l’a considerat fòrça grèu.

Very concerned about Spanish border police using rubber bullets to deter migrants in Ceuta. I expect clarifications from the authorities/CM

— Cecilia Malmström (@MalmstromEU) February 14, 2014

Campanha contra los “vòls de la vergonha”
 
Lo govèrn espanhòl es tanben criticat per la vulneracion de dreches umans, pr’amor del foncionament dels centres d’internament d’estrangièrs (CIE). La campanha per que se barre los CIE alèrta que de desenats de personas empresonadas dins los CIE seràn lèu deportadas en Senegal e en Marròc dins los diches “vòls de la vergonha”. Segon aquela campanha, aqueles vòls son una vulneracion dels dreches umans. Per aquò fan una crida a boicotar Air Europa, qu’es la companhiá aeriana qu’a lo contracte per far aqueles viatges.
 
Dempuèi que s’es atribuit lo contracte en decembre passat, i a ja agut almens quatre vòls —d’avions amb capacitat fins a dos cents passatgièrs— per deportar d’estrangièrs vèrs Marròc, un vòl vèrs l’Equator e dos de mai vèrs Nigèria. La campanha critica que lo govèrn espanhòl pague cada an 12 milions d’èuros a Air Europa per aqueles vòls de deportacion, “emplits mercés a de batudas policièras racistas”.
 
Segon l’ONG Barrem los CIE, dins un d’aqueles vòls, que se fan cada dos meses, partiràn de desenats de personas de nacionalitat senegalesa “que son estadas de victimas de las batudas racistas aquestas darrièras setmanas”. L’autre vòl portarà de marroquins cap a Xerès, ont seràn menats en autocar fins a Algesiras e ailà en fèrri fins a Ceuta: “Dins la meteissa frontièra ont i aguèt la repression salvatja fa qualques jorns, los policièrs espanhòls liuraràn los deportats a la polícia marroquina”, çò planh l’ONG.
 
La campanha denóncia aqueles desplaçaments forçats massisses e avertís que son illegals e que, e mai se l’estat espanhòl emplega de mots tecnics burocratics per los justificar, implican una violacion dels dreches umans. 




_____
Nòva segon La Sexta





Vidèo de la Gàrdia Civila