Los libaneses semblarián d’èsser acostumats a las bombas, tant qu’an fach una aplicacion pel telefòn mobil que permet d’avertir la familha e los amics qu’òm es viu après una explosion, segon çò que rapòrta VilaWeben collaboracion amb Global Voices.
 
L’aplicacion s’apèla “I am alive” e es fruch d’una idèa de Sandra Hassan, una estudianta libanesa de 26 ans que demòra a París. Lo foncionament es fòrça simple: cada còp que i a una explosion, cal solament dobrir l’aplicacion e clicar. Aquela accion manda automaticament una fiulada sus Twitter qu’anóncia “Soi encara viu! #Liban #DarrièraBomba”. (I am still alive #Lebanon #LatestBombing)
 
Hassan expliquèt sas rasons per far aquela aplicacion al blogaire d’NPR Rachel Martin. “Es un pauc frustrant que, almens pels que sèm en Liban, viscam dins una situacion que faga necita o utila una aplicacion coma aquesta. Ma faiçon d’exprimir aquesta frustracion foguèt de publicar l’aplicacion, una sòrta de crida contra la situacion actuala, una allegacion de malcontentament”.
 
Las reaccions a aquela aplicacion son divèrsas. Lo blogaire libanés Gino Raid, de Ginosblog, demandèt a las gents çò que ne pensavan e los comentaris èran majoritàriament negatius: “Trist e marrit. I a fòrça manièras de protestar e de demostrar qu’ès viu”; “D’umor negra? M’agrada pas”; “Es coma nos dire que serem pas jamai segurs”; vaicí qualques unas de las reaccions. Per contra lo blogaire Ross Brooks, de PSFK, aguèt un vejaire mai positiu: “Dins una epòca que las rets de telefonia mobila se saturan amb de telefonadas familialas, Internet ofrís una alternativa melhora quand se tracta de s’assegurar que lo tieu messatge arribe”, çò diguèt.